Arysqa kómek: SQO 100 tonnadan astam gýmanıtarlyq kómek jóneltti
«Halqymyzdyń birligin pash etetin «asar jasaý» jaqsy dástúri bar. Qıyn sátte Arystaǵy aǵaıynǵa kómektesý úshin Soltústik Qazaqstan oblysy asarlatyp, kelip qaldy. Qazir Arysta turǵyn úıler qalpyna keltirilýde. Atqarylyp jatqan jóndeý jumystarynyń barysyn qadaǵaladym. Qazir munda bizdiń oblystyń shuǵyl shtaby jumys isteýde», - dep jazdy SQO ákimi Qumar Aqsaqalov óziniń Facebook paraqshasynda.
Ákimniń habarlaýynsha, soltústikqazaqstandyqtar arystyqtarǵa 100 tonnadan asa gýmanıtarlyq kómek jóneltti.
«Arys turǵyndarymen kezdesip, soltústiktegi aǵaıynnyń sálemin jetkizdim. Jan-jaqty kómekke rıza bolǵan Arys jamaǵaty soltústikqazaqstandyqtarǵa alǵystaryn aıtýda», - dedi ákim.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty. Keltirilgen zalaldyń kólemi baǵalanyp, Úkimet rezervinen aqsha bólinedi.
