Arýjan Saın tótenshe jaǵdaı kezindegi qaıyrymdylyq qorynyń jumysy týraly aıtty
Onyń aıtýynsha, qazir tótenshe jaǵdaı kezinde qordyń atqarylatyn jumys aýqymdy.
«Qazirgi ýaqytta qor Bala quqyqtary jónindegi ýákil keńsesiniń jumysyn júzege asyrýda. Qor ádette aınalysatyn baǵytymen ǵana shektelip qalmaıdy. Alaıda bizde problema bar. Tótenshe jaǵdaıǵa baılanysty «Balalarǵa ómir syıla» jobasynyń balalary emdelýge shetelge shyǵa almaıdy, óıtkeni barlyq elder jabyq. Qudaıǵa shúkir, josparly jáne jaǵdaıy aýyr balalar joq. Emdeý saparlary keıinge shegerildi», - deıdi Arýjan Saın.
Sonymen qatar, ol qorǵa qaıyrymdylyq kórsetetin azamattardyń azaıǵanyn atap ótti.
«Pandemııa saldarynan adamdardyń qarjylyq jaǵdaıy qıyndap barady. Kóptegen kásipkerlerdiń bıznesi toqtap qaldy. Biz qoǵamdyq uıymbyz jáne azamattardan qaıyrymdylyq jınaımyz, sondyqtan kez kelgen daǵdarysty biz birinshi bolyp sezinemiz», - dedi A.Saın.
Onyń aıtýynsha, kómek suraıtyndar óte kóp. Balalardyń da sany artyp keledi.
«Karantın aıaqtalǵannan keıin biz balalardy emdelýge jiberemiz. Árıne, jasalatyn operatsııalarǵa aqsha kerek. Bul úlken másele. Ony qalaı sheshemiz ázirge belgisiz. Búgingi tańda «Balalarǵa ómir syıla» jobasynda 60-qa jýyq bala kómekke zárý. Olardyń arasynda arqa-bıfıda, epılepsııa, sırek kezdesetin genetıkalyq teri aýrýlary, epıdermolız, mýkovıstsıdoz aýrýymen aýratyn balalar bar»,- dedi ol.
Arýjan Saınnyń aıtýynsha, karantınge baılanysty álemdegi kóptegen kásiporyndardyń jabylýy men logıstıka máselesi dári-dármekti jetkizýde aıtarlyqtaı qıyndyqtar týyndatyp otyr.
«Biz qazir demeýshiler esebinen epılepsııamen aýyratyn naýqastarǵa arnalǵan dári-dármekti satyp alý úshin izdestirip jatyrmyz. Birqatar balalar Qazaqstanda tirkelmegen dári-dármekti qabyldaıdy jáne olar óte qymbat. Buryn ata-analar dárini ózderi Túrkııadan jáne basqa elderden aldyratyn. Ókinishke oraı qazir ondaı múmkindik joq. Óıtkeni karantınge baılanysty halyqaralyq reıster toqtady. Qazir «SQ-Farmatsııanyń» kómegimen kelissózder júrgizip jatyrmyz. Aqshasyn tóleıtin demeýshiler tabyldy, endi jetkizý máselesi tez sheshiledi dep úmittenemiz. Kóptegen balalardyń dárisi taýsylýǵa jaqyn qaldy», - dep túsindirdi Arýjan Saın.
Sonymen qatar, ol karantın kezeńinde dárigerler men klınıkalarǵa kórsetiletin kómek týraly aıtty.
«Biz qor demeýshileriniń esebinen jeke qorǵanys quraldaryn, bir ret qoldanylatyn jáne qaıta paıdalanýǵa bolatyn kıimderdi, dárigerlerge arnalǵan qorǵanys ekrandaryn, dezınfektsııa suıyǵyn, medıtsınalyq jabdyqtar satyp aldyq. Alǵashqy 10 myń dana partııany Almaty emhanalary men birqatar oblystarǵa jiberdik. Bul óte qajet edi. Seriktesterimizdiń arqasynda taǵy 60 myń qorǵanys ekrany satyp alyndy. Qyzylorda, Jambyl oblystaryna qorǵanys kıimderi men basqa da kómek jiberildi. Bul eki aımaq Almaty men Nur-Sultannan keıin indet juqtyrǵandar boıynsha kósh bastap tur. Qaraǵandy oblysy da nazardan tys qalmady. Shymkent qalasymen de jumys istep jatyrmyz. Dezınfektsııalyq qural men medıtsınalyq maskany emhanalarǵa, balalar jáne qarttar úılerine jiberdik. Sonymen qatar, aýrýhanalardan shyqpaı jumys istep jatqan almatylyq dárigerlerge tamaq jiberemiz», - dedi ol.
Búgingi kúni qor «Balalarǵa ómir syıla» jobasynyń aıasynda 1 855 balaǵa kómek kórsetti, kóptegen balalardy emdeý birneshe kezeńnen turady, sáıkesinshe 2 791 operatsııa/emdeý kýrsy tólendi.
Arýjan Saın atap ótkendeı, qor álemniń 70-ten astam elindegi klınıkalarmen jumys isteıdi. Negizgi prıntsıp - emdeý sapasy men quny. Qor múmkindiginshe kóp balalarǵa kómektesý úshin qazaqstandyq kásipkerler kórsetken kómekti tıimdi jumsaýǵa tyrysady.
Sóz sońynda ol barlyǵyn karantın rejımin saqtaýǵa, úıde bolýǵa shaqyrdy.
