Arýjan Saın qazaqsha bilmeıdi dep atqarǵan jumysyna qara kúıe jaǵýǵa bolmaıdy - Abaev
Suhbat barysynda baǵdarlama tizginshisi mınıstrden qazaqtildi spıker tabý - qazaqtildi jýrnalıster úshin qıyn sharýa ekendigin aıtyp, osyǵan oraı ne isteý kerektigin suraǵan edi.
«Suraý kerek, talap etý kerek. Árıne, árbir memlekettik organnyń baspasóz qyzmeti jumysyn sapaly júrgizýi tıis. Aqparatty qazaq tilinde alý, suraý - jýrnalısterdiń emes, qoǵamnyń, ýaqyttyń talaby. Qoǵam, ózderińiz de jaqsy bilesizder, qazaqylanyp kele jatyr. Sondyqtan da memlekettik organdar osyny túsinýi qajet. Biraq jýrnalıster de máseleniń baıybyna barýy kerek. Áıteýir suraý kerek eken dep oıyna kelgen suraqty qoıa salýǵa bolmaıdy. Qısyndy, oryndy, eń bastysy - qoǵamǵa qajetti degen saýatty saýal bolýy tıis», - dedi mınıstr.
Onyń aıtýynsha, suraq utymdy, qoǵamnyń kókeıinde júrgen bolsa, qandaı tilde qoıylsa da, kórermenge jetedi.
«Bizdiń áriptester osyny da eskerýi kerek dep oılaımyn. Ekinshiden, biz de til máselesin qoldan ýshyqtyra bermeýimiz kerek. Mysaly, sıýjetten Arýjan Saındy kórdik. Ol qazaq tilin bilmeıtin shyǵar. Biraq bizdiń qazaq balalarynyń múddesin qorǵap, kómektesip júr. Meniń oıymsha, Arýjan Saın qoldap, qorǵap júrgen balalardyń bireýi múmkin keleshekte qazaq tiliniń baılyǵy men kórkemdigin dúnıe júzine tanytatyn jazýshy bolatyn shyǵar. Kim biledi? Sondyqtan Arýjan Saın qazaq tilin durys bilmeıdi eken dep onyń atqaryp otyrǵan barlyq jumysyn joqqa shyǵaryp, qara kúıe jaǵa salý qanshalyqty qısyndy? Osyndaı dúnıelerden saq bolýymyz kerek», - dedi Dáýren Abaev.
