«Artyq tabysqa joǵary salyq belgileý durys pa?» - respýblıkalyq basylymdarǵa sholý
***
«Keshe Aqordada Elbasy Nursultan Nazarbaev Qazaqstanǵa resmı saparmen kelgen Ózbekstan Respýblıkasynyń Prezıdenti Islam Karımovpen kezdesip, ekijaqty kelissózder júrgizdi», - dep jazady «Egemen Qazaqstan» gazeti búgingi sanyndaǵy «Tamyry bir, taǵdyry uqsas kórshi» degen taqyryptaǵy maqalasynda. Basylymnyń jazýynsha, shaǵyn quramdaǵy kelissózder aıaqtalǵan soń keńeıtilgen quramdaǵy otyrys bastalarda eki memlekettiń basshylary qysqasha sóz sóıledi. Onda Qazaqstan Prezıdenti Nursultan Nazarbaev Ózbekstan Prezıdenti Islam Karımov pen delegatsııa múshelerin qazaq jerinde qarsy alýǵa qýanyshty ekenin bildirdi. «Sizdiń resmı saparyńyz eki eldiń arasyndaǵy ekonomıkalyq qarym-qatynasty, halyqtarymyzdyń arasyndaǵy dostyqty odan ári nyǵaıta beredi degen úmittemin. Keshe bastalǵan kelissózder barysynda eki eldiń arasyndaǵy yntymaqtastyqty odan ári damytýǵa baǵyttalǵan kóptegen máseleler qaraldy», - deı kelip Prezıdent mártebeli qonaqty jýyrda bolǵan Ózbekstan táýelsizdigi merekesi (1 qyrkúıek) kúnimen quttyqtap, týysqan ózbek halqyna beıbit ómir, jarqyn bolashaq tiledi.
***
Elbasymyz «bul zaman - bilekke emes, bilimge senetin zaman. Zamanaýı álemde eldiń qýaty, eń aldymen, bilim men ǵylymda bolatyn ýaqytqa keldik» dep, bolashaǵymyz úshin bilimniń mańyzy zor ekenin atap aıtyp jatsa da, elimizde bilim alýǵa umtylǵan jastarǵa kedergi jeterlik. Sonyń aıǵaǵy, statıstıkaǵa sensek, sońǵy jyldary elimizdegi stýdentter sany aıtarlyqtaı azaıyp kele jatqany baıqalady. Mine osy jaıt arqaý bolǵan maqala «Alash aınasy» gazetinde «Aqyly oqý qymbattaı berse aýyl balasy qaıda oqıdy?» degen taqyryppen basyldy. «Kim balasynyń bilimdi bolǵanyn qalamaıdy deısiń. Áıtse de «jomarttyń qolyn joqtyq baılaıtynyndaı» grantqa baly jetpegen jastardyń báriniń birdeı aqyly bilim alýdy jaǵdaıy kótermegendikten, kóptegen jastardyń eriksiz bilimsiz qalyp jatqany ras. Munyń sońy elimizde bilimsiz, jumyssyz jastardyń kóbeıýine alyp kelýde», - dep jazady basylym.
«Alash aınasy» gazetiniń jazýynsha, Aleksandr Vınokýrovtyń London Olımpıadasyndaǵy jeńisinen keıin jer jahanda qazaq velosportyna, onyń ishinde Qyzyljardaǵy velomektepke qyzyǵýshylar sany artqany anyq. Degenmen bul jeńis qazaq jankúıerlerine qýanyshpen birge ókinishin de ala keldi. Ókinishtisi sol, 38 jasynda teńdessiz atanǵan Vıno úlken sportpen qoshtasty. Álemdik dodalarda tek Aleksandrǵa senim artyp úırengen bizdiń elde velosporttan tuńǵysh Olımpıada chempıonynyń izin basar sportshy shyǵa ma degen oı búginde kóptiń kókeıinde júr. Tuńǵysh medal sońǵy bolyp qalmaýy úshin óńirlerdegi velosport mektepteriniń múshkil jaǵdaıyn jaqsartý kerek sııaqty. Maqala «Qazaq velosporty olımp shyńyndaǵy ornyn saqtap qala ala ma?» degen taqyryppen berilgen.
***
«Májilis depýtattarynyń bir toby Qazaqstan Respýblıkasynyń Salyq kodeksine engiziletin ózgertýler jobasyn ázirleýge kirisip ketti», - dep jazady «Aıqyn» gazeti. Basylymnyń atap ótýinshe, jańa usynysqa sáıkeselimizde basy artyq molshylyq ıelerine salynatyn salyq túri paıda bolýy múmkin. «Negizinde qandaı tabys bolsa, soǵan sáıkes salyq salynǵany ádiletti. Bul kóptegen elderdiń tájirıbesinde bar. Al tabysty jasyrý, odan tıisti tólemder tóleýden qashý - qylmystyń kóbeıýine alyp keledi. Eń qaýiptisi - salyq óndirýdegi ádiletsizdik qoǵamda qarapaıym adamdardyń baı, dáýletti adamdarǵa degen jekkórýshilik sezimin ulǵaıta beredi», - depti basylymǵa ekonomıka ǵylymynyń kandıdaty Jetpisbaı Bekbolatuly. Maqala «Artyq tabysqa joǵary salyq belgileý durys pa?» degen taqyryppen berilgen.
