Arnaıy operatsııa kezinde elordada zańsyz kóshi-qon arnasy áshkerelendi
ASTANA. KAZINFORM – Aqmola oblystyq PD qyzmetkerleri elordada zańsyz kóshi-qon arnasyn áshkereledi.
Aýqymdy arnaıy operatsııa nátıjesinde Aqmola oblysy polıtsııa departamentiniń uıymdasqan qylmysqa qarsy kúres basqarmasy, oblystyq prokýratýranyń úılestirýimen, elorda aýmaǵynda zańsyz kóshi-qondy uıymdastyrǵan qylmystyq toptyń jolyn kesti.
Tergeý derekterine sáıkes, qylmystyq shemany Tselınograd aýdany Talapker aýylynyń 49 jastaǵy turǵyny uıymdastyrǵan.
Ol Qazaqstan aýmaǵyna kelgen sheteldik azamattardy taýyp, olarǵa ýaqytsha turýǵa, tirkelýge nemese turýǵa yqtııarhat alýǵa járdemdesýdi usynǵan.
Bul qyzmetke ózge tulǵalar da tartylyp, qylmystyq top qurylymdyq túrde jumys istegen.
Fıgýranttar jalǵan qujattardy rásimdeý arqyly kórsetken qyzmetteri úshin 40 myńnan 2 mıllıon teńgege deıin syıaqy alyp otyrǵan.
Jedel izdestirý sharalary barysynda tártip saqshylary aıǵaq zattar – qujattar, mórler men anyqtamalardy tárkiledi. Qazirgi ýaqytta zańsyz kóshi-qon faktisi boıynsha qylmystyq is qozǵalyp, toptyń ózge de zańsyz áreketteri muqııat tekserilip jatyr. Tergeý amaldary jalǵasyp jatyr.
Aıta ketelik UQK qyrkúıek aıynda para alý men berýge qatysty 10 derekti anyqtaǵan edi.