Armenııadaǵy Qazaqstan mádenı kúnderine úsh myńnan astam adam qatysty
ASTANA. KAZINFORM – Armenııa Respýblıkasynda ótken Qazaqstan mádenı kúnderi aıasynda Aram Hachatýrıan atyndaǵy kontsert zalynda qazaqstandyq ónerpazdardyń gala-kontserti ótti.
Aýqymdy mádenı shara Qazaqstan Respýblıkasynyń Prezıdenti Qasym-Jomart Toqaevtyń 2023 jyly Erevan qalasyna jasaǵan resmı sapary barysynda Memleket basshylarynyń qol jetkizgen kelisimderi nátıjesinde uıymdastyryldy.
Іs-sharaǵa Qazaqstan Respýblıkasy Mádenıet jáne aqparat mınıstri, resmı delegatsııa basshysy Aıda Balaeva, Armenııa Respýblıkasynyń Bilim, ǵylym, mádenıet jáne sport mınıstri Janna Andreasıan, Qazaqstan Respýblıkasynyń Armenııadaǵy Tótenshe jáne ókiletti elshisi Bolat Imanbaev, sondaı-aq armıan zııaly qaýymy ókilderi, dıplomatııalyq korpýs, shyǵarmashylyq odaqtar, qazaq dıasporasy, ǵalymdar, jazýshylar men mádenıet qaıratkerleri qatysty.
— Búgingi ıgi is-shara — Memleket basshylarynyń dostyq qarym-qatynasy men eki el arasyndaǵy strategııalyq áriptestiktiń jemisi. Bizdiń búgingi kezdesýimiz qasıetti Pasha merekesimen tuspa-tus kelip otyrǵanyn atap ótkim keledi. Bul da — dostyq pen birliktiń, janashyrlyq pen meıirimge bastaıtyn izgiliktiń sımvoly. Aldaǵy ýaqytta elderimiz arasyndaǵy baılanys berik ári nátıjeli bolaryna senemin. Sebebi óner men mádenıette eshqandaı shekara bolmaıdy. Mádenıet elderdi biriktiredi, halyqtar arasyndaǵy ózara túsinistik pen qurmettiń negizin qalaıdy. Ortaq qundylyqtar men shyǵarmashylyq baılanys — beıbitshilik pen dostyqtyń myzǵymas dánekeri, — dedi Aıda Balaeva quttyqtaý sózinde.
Gala-kontsert baǵdarlamasy kórermenge erekshe áser syılady. Onda halyq ánderi men zamanaýı kompozıtorlardyń týyndylary, qazaqstandyq estrada, klassıka men folklor úndesip, úılesim tapty. Sahna tórinde aty ańyzǵa aınalǵan ánshi, Qazaqstannyń Eńbek Eri Roza Rymbaeva, Qazaqstannyń eńbek sińirgen qaıratkerleri Aleksandr Belıakov pen Aıgerim Beketaeva, HasSak etnofolklorlyq ansambli, «Birlik» bı ansambli, «Daryn» memlekettik jastar syılyǵynyń laýreattary Rasýl Jarmaǵambetov, Asqar Muqııat jáne basqa da qazaqstandyq ártister óner kórsetti.
Kórermender árbir ónerpazdy ystyq yqylaspen, qurmetpen qarsy aldy. Kontsert sońynda kórermender oryndarynan tik turyp, qoshemet kórsetti. Bul — qazaqstandyq ónerge degen shynaıy qyzyǵýshylyq pen iltıpattyń kórinisi. Gala-kontsert shynaıy mádenıet pen dostyq merekesine aınaldy.
Armenııadaǵy Qazaqstan mádenı kúnderi aıasyndaǵy is-sharalarǵa 3000-nan astam adam qatysty. Sonymen qatar, qos eldiń mınıstrleri — Aıda Balaeva men Janna Andreasıan arasynda ekijaqty kezdesý ótip, mádenı yntymaqtastyqty keńeıtý máseleleri talqylandy. Іs-sharalar baǵdarlamasynda qazaqstandyq fılmder kórsetilip, Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti.
Budan bólek, Qazaqstannyń resmı delegatsııasy túrli salalar boıynsha armıan áriptesterimen kezdesýler ótkizip, aqparat, mýzeı jáne kitaphana isi, kınoóndiris salalaryndaǵy yntymaqtastyqtyń keleshegi, birlesken bastamalar jóninde pikir almasty.
Aıta ketý kerek, Qazaqstan men Armenııa arasyndaǵy dıplomatııalyq qarym-qatynastar ornaǵan ýaqyttan beri mundaı aýqymdy mádenı shara alǵash ret uıymdastyrylyp otyr. Qazaqstan mádenı kúnderi Armenııada alǵash ret joǵary memlekettik deńgeıde ótti. Buǵan deıin, 2024 jyldyń qazan aıynda Astanada Armenııa mádenıeti kúnderi ótken bolatyn.
Aıta ketelik Erevanda Abaı Qunanbaıuly atyndaǵy saıabaq ashylǵan edi.