Armenııada bılikti basyp alǵys kelgen 14 adam qamaýǵa alyndy – Pashınıan

ASTANA. KAZINFORM — Armenııa Premer-mınıstri Nıkol Pashınıannyń aıtýynsha, elde bılikti kúshpen basyp alý áreketi joly kesildi, dep jazdy DW.

Onyń sózinshe, bul áreketti «qylmystyq-olıgarhııalyq dinı toptar» uıymdastyrǵan. Bul is boıynsha Armenııada 14 adam, onyń ishinde arhıepıskop ta ustalǵan.

Pashınıan 25 maýsym, sársenbi kúni Telegram-arnasynda jarııalaǵan jazbasynda:

— Polıtsııa qyzmetkerleri Armenııa Respýblıkasyndaǵy jaǵdaıdy turaqsyzdandyrý jáne bılikti basyp alý jónindegi qylmystyq-olıgarhııalyq dinı toptardyń aýqymdy ári zulym josparyn júzege asyrtpaı, der kezinde toqtatty, — dep málimdedi.

Bılikti kúshpen basyp alý áreketi boıynsha 14 adam qamaýǵa alynǵan. Olardyń qatarynda Armıan Apostol shirkeýiniń arhıepıskopy Bagrat (Galstanıan) da bar. Arhıepıskop úkimetke baǵyttalǵan ótkir synymen tanymal.

Quqyq qorǵaý organdary 90-nan astam tintý jumystaryn júrgizdi. Oppozıtsııa bul áreketterdi saıası astary bar qýdalaý dep atady.

Tańerteńnen beri «Qasıetti kúres» qozǵalysy músheleri men jaqtastarynyń úılerinde tintýler júrgizilgen. Uıym lıderi arhıepıskop Bagratpen birge tergeýge Armenııa oppozıtsııalyq «Armenııa» blogynyń depýtaty Artýr Sarkısıan, eldegi eń kóne partııa — «Dashnaktsýtıýn» múshesi Igor Sarkısıan, moıyndalmaǵan Taýly Qarabaq parlamentiniń burynǵy depýtaty Davıd Galstıan jetkizilgen.

Armenııa Tergeý komıteti ǵımaratynyń aldynda ustalǵandardyń jaqtastary jınalyp, ishki áskerler de sonda shoǵyrlandy.

Eske sala keteıik, buǵan deıin osy máselege qatysty Qazaqstan SІM resmı ókili Aıbek Smadııarov túsinikteme bergen edi.