Armanym — olımp shyńyn baǵyndyrý — Zeınep Baıanova
ORAL. KAZINFORM — Jýyrda batysqazaqstandyq balýan Zeınep Baıanova áıelder kúresinen Azııa chempıonatynyń qola júldesin jeńip aldy. Bul — onyń eresekter arasynda jarystaǵy alǵashqy medali. Sonymen qatar ile-shala 23 jasqa deıingiler arasynda Qazaqstan chempıony bolyp oralǵan sportshymen Kazinform tilshisi suhbattasqan edi.
— Zeınep Málikqyzy, jeńisiń qutty bolsyn! Aldymen sporttyq jolyńa toqtala ketseń?
— Men ózim Aqjaıyq aýdany Chapaev aýylynda týyp-óstim. Jalpy, otbasym óte úlken, ata-anam jáne bes baýyrym bar. Sportqa kishkentaı kezimde ózimniń týǵan ápkem Málıkanyń arqasynda keldim. Bastapqyda ol meni ózimen birge yntam bar ma dep, kúres zalyna bir-eki ret aparǵan. Sodan osy sport túrine qyzyǵýshylyǵym oıanyp, birte-birte jattyǵýǵa da, jarysqa da úırenip kettim. Otbasynda ázirge sport jolyna túsken ózim ǵanamyn. Degenmen kishkentaı sińlilerim bar, olardan úmitim joq emes.
— Alǵashqy jáne qazirgi bapkeriń jóninde ne aıtar ediń?
— Bastapqyda týǵan jerim — Aqjaıyq aýdanynda Rýlan Hamzınniń qolastynda jattyqtym. Qazirgi tańda jeke bapkerim — Musabek Naregeev. Osy aǵalardan kóp nárseni kókeıge túıdim. Olar erinbeı-jalyqpaı, kúreske baýlyp, ádis-tásilderdi úıretti. Óz maqsatyńa jetý jolynda qaıtpas qaısarlyq kerektigin uǵyndyrdy. Sol úshin shyn júrekten alǵysymdy aıtamyn.
— Osy ýaqytqa deıin qandaı tabystarǵa qol jetkizdiń?
— Eń bastylaryn aıtsam, 11 dúrkin Qazaqstan chempıonymyn. Oǵan qosa Azııa chempıonatynyń eki márte kúmis jáne tórt dúrkin qola júldegerimin. Degenmen bıylǵy eresekter arasynda Azııa chempıonatynda alǵan qola medaldiń ázirshe men úshin jóni bólek. Eresekter arasynda alǵash ret synǵa túskendikten, óte qıyn boldy. Tynbaı jattyǵý men jan-jaqty ázirliktiń arqasynda júldegerler qatarynan kórindim. Munymen shektelmeımiz. Kelesi joly budan da jaqsy daıyndyqpen baryp, júldemen oralýǵa tyrysamyn. Qazir jıyrma jastamyn, sol sebepti bolashaǵym alda dep oılaımyn.
— Iordanııa astanasy Amman qalasynda ótken sary qurlyq dodasynda 53 kelige deıingi salmaqta qola júlde úshin básekedegi qarsylasyń, mońǵolııalyq Otgontýıa Chınboldtan budan buryn úsh ret jeńilip qalǵan ekensiń. Eseni qaıtarýdyń qalaı sáti tústi?
— Iá, mońǵol balýanymen 2024 jyldyń basynda Túrkııada ótken týrnırde kezdesken edim. Ótken jyly sondaı-aq 23 jasqa deıingiler arasynda Azııa chempıonatynda jartylaı fınalda 6:8 esebimen ese jiberip edim. Sosyn álem chempıonatynda qola júlde úshin beldesýde de jeńe almap edim. Osy joly qalaıda utamyn dep bekinip shyqtym. Bul jerde bapkerimniń de úlesi mol. Óıtkeni ol kisi bul joly múlde basqasha kúresý kerektigin qadap aıtty. Úzilis arasynda da durys baǵyt bere bildi. Mine, sonyń arqasynda azýly qarsylasymdy 10:6 esebimen tize búktirdim.
— Azııa birinshiliginen keıin 23 jasqa deıingiler arasynda Qazaqstan chempıony atanyp keldiń. Qazaq elindegi básekelestik qandaı? Negizgi qarsylastaryń kimder?
— 23 jasqa deıingi Qazaqstan birinshiliginde aıtarlyqtaı qarsylastar bolmady desem, artyq aıtqandyq emes. Onyń ústine Azııa chempıonatynan keıin ózime degen nyq senimmen bardym.
— Bıyl qandaı jarystar bar?
— Buıyrsa, aldaǵy mamyr aıynda eresekter arasynda Qazaqstan chempıonaty ótedi, sonda baq synaımyn. Sonymen qatar 23 jasqa deıingiler arasynda Azııa jáne álem chempıonaty bolady. Sol jarystarda el namysyn abyroımen qorǵasam deımin.
— Qazir qaıda oqyp júrsiń? Bos ýaqytta nemen aınalysasyń, hobbıiń qandaı?
— Men Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń 2024 jylǵy túlegimin. Qazirgi tańda magıstratýraǵa tapsyryp kórý oıda bar. Shyny kerek, bos ýaqyt bola bermeıdi. Kóbine jattyǵýda bolamyn. Eger qolym bosaı qalsa, otbasyma, jaqyndaryma ýaqyt bólýge tyrysamyn. Kıno qarap, serýendegendi janym unatady.
— Sońǵy saýal, aldaǵy arman-maqsattaryń qandaı?
— Árıne, basty armanym — olımpıada shyńyn baǵyndyrý. Oǵan kúshtiniń kúshtisi ǵana jetetinin túsinemin. Ýaqyt ta kóp qalǵan joq. Sondyqtan bapkerimmen birge naqty qadam jasap, myqty jospar qurý ústindemiz.
— Áńgimeńe rahmet, Zeınep! Armanyńa jetýińe tilektespin.
Eske sala keteıik, budan buryn Azııa chempıonatynda Zeınep Baıanovanyń áıelder quramasyna alǵashqy medaldi alyp bergenin jazǵan bolatynbyz.