Arqan tartystan V Dúnıejúzilik kóshpendiler oıynyna irikteý jarystary bastalady
ASTANA. KAZINFORM – Respýblıkalyq arqan tartys federatsııasy 5-shi Dúnıejúzilik kóshpendiler oıyndaryna arqan tartystan erler men áıelder arasynda irikteý jarysyn ótkizedi.
Atalǵan federatsııa málim etkendeı, jarys ІІ kezeńnen turady. І kezeńde aımaqtyq irikteý syndarynda, ІІ kezeńde aımaqtyq jarystardyń jeńimpazdary fınaldyq synda baq synaıdy.
Ortalyq aımaqtyń irikteý kezeńi 13-aqpan kúni Astana qalasyndaǵy №7 balalar men jasóspirimder sport mektebiniń sport kesheninde (meken jaıy: Óndiris kóshesi, 14a) ótedi. Ortalyq aımaqtyq jarysqa Astana qalasy, Almaty, Qaraǵandy, Ulytaý oblystarynyń komandalary qatysa alady.
Soltústik aımaqtyq irikteý kezeńi 17-aqpan kúni Kókshetaý qalasynda «Jeńil atletıka manejinde» (meken jaıy: Abaı kóshesi, 116ý) ótedi. Soltústik aımaqta Aqmola, Qostanaı, Pavlodar, SQO oblystary básekege túsedi.
Shyǵys aımaqtyq báseke Abaı, Jetisý, ShQO jáne Almaty qalasy sportshylarynyń arasynda ótpek. Shyǵys aımaqtyq irikteý kezeńi 20-aqpan kúni Semeı qalasyndaǵy Dene shynyqtyrý-saýyqtyrý kesheninde (meken jaıy: Dastenov kóshesi, 34) bolady.
Atyraý, Aqtóbe, Mańǵystaý, Batys Qazaqstan oblystary Batys aımaqtyq irikteý kezeńinde Atyraýda bas qosady. Qatysýshylar 24 aqpan kúni №5 balalar men jasóspirimder sport mektebiniń sport keshenine (meken jaıy: Nursaıa 28a) jınalady.
28 aqpan kúni Taraz qalasyndaǵy Olımpıada jetkinshekterin daıarlaý ortalyǵynyń sport kesheninde (meken jaıy: Jambyl dańǵyly, 16) Jambyl, Qyzylorda, Túrkistan oblystary men Shymkent qalasynyń sportshylary kúsh synasady.
Fınaldyq tartys 7 naýryz kúni Astana qalasynda ótedi.
Aıta keteıik, Dúnıejúzilik kóshpendiler oıyndary – etnıkalyq, dástúrli sport túrleri boıynsha ótetin halyqaralyq jarys.
2014, 2016 jáne 2018 jyldary Qyrǵyzstannyń Sholpan Ata qalasynda ótse, 2022 jyly Túrkııanyń Iznık shaharynda tórtinshi Dúnıejúzilik oıyndar uıymdastyryldy.
Endi V Dúnıejúzilik kóshpendiler oıyny bıyl, ıaǵnı 2024 jyly 8-14 qyrkúıek aralyǵynda Astana qalasynda ótedi.
