Arqan tartystan ulttyq qurama: Qarsylastarymyzǵa arnaıy taktıka quryp jatyrmyz

ASTANA. KAZINFORM – Túrki álemi kóz tikken V Dúnıejúzilik kóshpendiler oıyndaryna 16 kún qaldy. Búgingi tańda ulttyq qurama sportshylary anyqtalyp, qatysýshylardyń barlyǵy derlik dúbirli dodaǵa tolyqtaı daıyn.

Arqan tartystan ulttyq qurama 21 tamyz kúni kóshpendiler oıyndary aldyndaǵy qorytyndy daıyndyǵyn bastap ketti, dep habarlaıdy «Ulttyq jáne at sporty túrleri ortalyǵynyń» baspasóz qyzmeti.

«Kóshpendiler oıyndaryna qyzý daıyndalyp jatyrmyz. 7 qyrkúıekke deıin osy ortalyqta jattyǵýlarymyzdy pysyqtaımyz. Ulttyq quramaǵa tolyq senemin. Sebebi bul qyz-jigitterdiń qaýqaryn naýryz aıynda ótken respýblıkalyq irikteý oıyndarynda kórgenmin. Basty qarsylastarymyz – Anglııa, Pákistan jáne Qyrǵyzstan. Olardyń tartystaryn aldyn ala zerttep, taktıka da quryp qoıdyq. El tarıhynda altyn áriptermen jazylatyn dodanyń jeńis tuǵyrynan kórinemiz degen úmittemin», – dedi arqan tartys federatsııasynyń vıtse-prezıdenti Nurlan Jabaev.

Arqan tartys federatsııasynyń bas dırektory Rasýl Tilenov sportshylar dúbirli dodaǵa tolyq daıyn ekenin aıtty. 

«Biz osyǵan deıin tek jattyǵýmen shektelmeı, shekara asyp týrnırlerge de qatystyq. Atap aıtar bolsaq, Ekaterınbýrg, Tıýmen qalalarynda ótken halyqaralyq jarystarda tájirıbe jınap qana qoımaı, jeńis tuǵyrynan kórindik. Endi bar kúshimizdi kóshpendiler oıyndaryna salamyz», – dedi federatsııanyń bas dırektory.

Aıta keteıik, bıyl qańtar aıynda arqan tartys federatsııasy quryldy. Federatsııa Astanada ótetin Dúnıejúzilik kóshpendiler oıyndaryna ulttyq qurama jasaqtaý úshin respýblıkanyń barlyq aımaǵynda irikteý oıyndaryn ótkizdi.