Arqalyqta et tapshy ma

ASTANA. KAZINFORM – Áleýmettik jelide Arqalyq turǵyndary et tapshylyǵy men mal soıýdaǵy qıyndyqtar týraly aıtyp jatqan beınejazba tarady.

Et satýshylardyń aıtýynsha, maldy et kombınatyna jetkizip, soıý qyzmetine aqy tóleý ónimniń ózindik qunyn arttyrady.

Bul jaǵdaıǵa qatysty qala ákimdigi túsinikteme berdi. Jergilikti bıliktiń málimetinshe, búginde ýákiletti organ veterınarııalyq baqylaý jáne qadaǵalaý jónindegi aýmaqtyq ınspektsııa veterınarııalyq ilespe qujattardy rásimdeý jáne berý qaǵıdalarynyń oryndalýyn baqylaý jumystaryn júrgizip jatyr.

- Qoldanystaǵy zańnama aıasynda veterınarııalyq anyqtamalardy rásimdeý maldy resmı jaǵdaıda soıý qamtamasyz etilgen kezde ǵana múmkin, ıaǵnı veterınarııalyq-sanıtarııalyq talaptarǵa saı jumys isteıtin soıý pýnktteri nemese alańdary arqyly júzege asyrylýy tıis, - delingen túsiniktemede.

Sońǵy málimet boıynsha, naryq pen saýda núktelerinde satýǵa arnalǵan maldy soıý «Torǵaı Et» JShS et kombınatynyń soıý alańynda júrgiziledi. Atalǵan kásiporyn tolyq veterınarııalyq-sanıtarııalyq baqylaý tsıklin, ilespe qujattardy rásimdeýdi jáne etti ýaqytsha saqtaýdy qamtamasyz etedi.

- «Torǵaı Et» JShS-niń baǵa preıskýrantyna sáıkes, soıý qyzmetiniń quny usaq mal bir basqa 5 622 teńge, iri qara mal – 20 873 teńge, jylqy – 30 900 teńge. Qajet bolǵan jaǵdaıda etti saqtaý úshin bir tonnasyna aıyna 110 000 teńge kóleminde tólenetin tońazytqysh kamera usynylady, - dep habarlady ákimdik.

Sonymen qatar «Týgambaeva-R» jeke kásipkerligine tıesili soıý alańynda talap buzýshylyqty joıý jumystary júrgizilip jatyr. Mekemeni qarashanyń ortasynda qaıta iske qosý josparlanyp otyr. Óńirde qosymsha úsh soıý pýnktin salý múmkindigi de qarastyrylyp otyr.

Qazir etpen qamtamasyz etý maqsatynda Qostanaı qalasyndaǵy «Tobyl» áleýmettik-kásipkerlik korporatsııasy arqyly «Qarasý Et» JShS-nen naryq baǵasynan tómen baǵamen 300 keli sıyr eti jetkizilgen.

Taıaýda Aýyl sharýashylyǵy mınıstri Aıdarbek Saparov elimizde et baǵasy kelesi jyly da qazirgi deńgeıde saqtalý kerektigin aıtty.