Arystanbek Muhamedıuly 11 jylǵa sottaldy

ASTANA. KAZINFORM –  Burynǵy Mádenıet jáne sport mınıstri Arystanbek Muhamedıuly 11 jylǵa bas bostandyǵynan aıyryldy.

Astana qalasynyń qylmystyq ister jónindegi mamandandyrylǵan aýdanaralyq soty burynǵy mınıstr men onyń sybaılastaryna qatysty úkim shyǵardy.

«Sot úkimimen M. asa iri mólsherde para berýge oqtalǵany úshin kináli dep tanylyp, Qylmystyq kodekstiń 58-babynyń 3 jáne 6-bólikteri negizinde, 20.06.2023 jylǵy Astana qalasynyń qylmystyq ister jónindegi aýdanaralyq sotynyń úkimimen taǵaıyndalǵan qatań jazany neǵurlym qatań jazaǵa sińirý jolymen qylmystyq quqyq buzýshylyqtar jıyntyǵy boıynsha ómir boıyna memlekettik qyzmette laýazymdardy atqarýǵa tyıym salyna otyryp, 11 jylǵa bas bostandyǵynan aıyryldy», - delingen sot úkiminde.

Odan bólek, onyń jubaıy Ǵalııa Ysqaqova paraqorlyqqa deldaldyq jasaǵany úshin kináli dep tanylyp (QK 368-babynyń 1-bóligi), ómir boıy memlekettik qyzmette qyzmet atqarýǵa tyıym salynyp, 6 aıǵa bas bostandyǵynan aıyryldy.

Sondaı-aq, sot úkimimen A.Muhamedıulynyń advokaty Mustahım Tóleev asa iri mólsherde alaıaqtyq jasaǵany úshin kináli dep tanylyp (QK 190-baby 4-bóliginiń 2) tarmaǵy), 10 jyl merzimge advokattyq qyzmetpen aınalysý quqyǵynan aıyryla otyryp, 6 jyl 8 aıǵa bas bostandyǵynan aıyryldy.

Úkim zańdy kúshine engen joq.

Eske sala keteıik, Ulttyq mýzeıdiń burynǵy dırektory Arystanbek Muhamedıuly 2022 jyly 28 mamyrda qamaýǵa alynǵan edi. 

Antıkor mýzeı basshysyna «Altyn adamnyń álem mýzeılerine sherýi» halyqaralyq kórmesin ótkizý barysynda qarjy jymqyrdy degen aıyp taqty.

Degenmen Arystanbek Muhamedıuly sotta kinásin moıyndamady. 

Sondaı-aq sot Arystanbek Muhamedıulyn úıqamaqqa aýystyrýdan bas tartty.