Arǵyn Nyǵmatýlın halyqaralyq izdeýde — Bas prokýratýra

ASTANA. KAZINFORM — QR Bas prokýrorynyń orynbasary Áset Shyndalıev jaqynda izdeý jarııalanǵan Arǵyn Nyǵmatýlınge qatysty pikir aıtty.

Onyń aıtýynsha, Arǵyn Nyǵmatýlınge halyqaralyq izdeý jarııalandy jáne ony Interpol iske asyrady.

— Halyqaralyq izdeý únemi Interpol arqyly júrgiziledi. Bizdiń quqyq qorǵaý organdary muny óz betimen jasaı almaıdy… Interpol arqyly qyzyl bıýlleten shyǵady, sosyn olar anyqtap, esep beredi, — dedi Áset Shyndalıev Senattyń jalpy otyrysynan keıin tilshiler suraǵyna jaýap bere otyryp.

Budan buryn habarlanǵandaı, jaqynda elimizdiń prokýratýra organdary Arǵyn Nyǵmatýlınge izdeý jarııalady.

Quqyqtyq statıstıka jáne arnaıy esepke alý organdarynyń portalynda jarııalanǵan málimetke qaraǵanda, prokýratýra organdarynyń bastama jasaýymen Sybaılas jemqorlyqqa qarsy is-qımyl agenttigi 1955 jyly 28 maýsymda dúnıege kelgen Nyǵmatýlın Arǵyn Zaırollaulyna izdestirý jumystaryn júrgizedi.