Argentına halqy chempıondaryn zor qoshemetpen kútip aldy

ASTANA. QazAqparat – Argentına qaharmandaryn qarsy alyp jatyr. Jeksenbi kúni Frantsııany jeńgen ulttyq qurama búgin Qatardan fýtboldan álem chempıonatynyń altyn júldesimen oraldy, dep habarlaıdy QazAqparat Euronews-ke silteme jasap.

Memlekettik áýe kompanııasynyń ushaǵy Býenos-Aıreske seısenbi tańerteń qondy.

Áýejaıda jankúıerler jınaldy. Negizgi qurmet kórsetý saltanaty Argentına astanasynyń ortalyǵyndaǵy eskertkish mańynda tústen keıin ótedi.

Argentına úkimeti búkil halyq saltanatty jıynǵa qatysýy úshin seısenbi kúnin demalys dep jarııalady.

Aty ańyzǵa aınalǵan Leo Messı bastaǵan álem chempıondary Argentına fýtbol qaýymdastyǵynyń ortalyǵynan qala ortasyndaǵy eskertkishke jol tartty.

Albıseleste álem chempıony tıtýlyn úshinshi ret jeńip aldy. Sońǵy ret olar 1986 jyly Meksıkada jeńimpaz atanǵan edi.

Eske salaıyq, Qatarda fýtboldan álem chempıonatynyń fınalynda Argentına men Frantsııa quramalary altyn júldeni sarapqa salyp, oıyn Argentınanyń jeńisimen aıaqtalǵan edi.

Argentına kapıtany Lıonel Messı Qatarda ótken álem chempıonatynyń úzdik oıynshysy atandy.

FOTO: «ChEMPIONAT»