Árbir segizinshi qazaqstandyq volonterlik qyzmetke qatysqan - sarapshy

NUR-SULTAN. QazAqparat – Qazaqstanda volonterlikti damytýdy memlekettik qoldaý standartyn engizý josparlanyp otyr. Bul týraly respýblıkalyq volonterler front-ofıs jobasynyń jetekshisi, «Ulttyq volonterlik jeli» ZTB atqarýshy dırektory Tatıana Mıronıýk aıtty, dep habarlaıdy QazAqparat tilshisi.

Spıkerdiń aıtýynsha, bastamalardyń 80%-dan astamy tirkelmegen volonterlik uıymdardan keledi. Al, 2020 jyly – volonterler jyly aıasynda 200 myńnan astam erikti tartylǵan. Statıstıkaǵa sáıkes, 2021 jyly 160 myń adam volonterlikpen aınalysqan.

«2020 jyly qurylǵan respýblıkalyq front-ofıs statıstıkamen ǵana emes, turaqty resýrstyq, bilim berý jáne aqparattyq qoldaýmen de aınalysady. Bul aralyqta qandaı jetistikke jettik? Volonterlik qyzmet týraly zańǵa engizilgen jańa ózgeristerge sáıkes, volonterlikti damytýdy memlekettik qoldaý standarty jazyldy. Jaqyn arada biz ony iske qosamyz jáne ol árbir óńirdiń ereksheligin eskere otyryp, strategııalyq qujat retinde qoldanylady dep úmittenemiz», - dedi T. Mıronıýk.

Sonymen birge, T. Mıronıýk qazir eriktilerdiń turaqty negizde volonterlik qyzmetpen aınalysa bastaǵanyn aıtty.

«Tereńirek úńilsek, árbir segizinshi qazaqstandyq qandaı da bir volonterlik qyzmetke qatysqan. Tek olardy qoǵamda erikti dep aıtpaıdy. Tirkelmegen jáne ózderin eriktiler dep atamaıtyn kóptegen uıymdar bar, biraq olar qoǵamnyń ıgiligi úshin erikti, aqysyz jumys isteıdi. Volonterlikti qatty retteý, álemdik praktıka boıynsha qandaı da bir shekteý jasaý múmkin emes, qajet te emes. Volonter – ózi úshin kez kelgen qyzmetti tańdaýǵa jáne oǵan óz erkimen qatysýǵa quqyǵy bar adam», - dedi T. Mıronıýk.

Aıta keteıik, Qazaqstanda Ortalyq Azııa volonterleriniń alǵashqy forýmy ótip jatyr.