Araldyń balyǵy 8 memleketke eksporttaldy

QYZYLORDA. KAZINFORM – Bıyl 3 aıda Qyzylorda oblysynda 1493,7 tonna balyq aýlansa, sonyń 93%-y Kishi Aral teńizine tıesili. 

Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, osy ýaqyt aralyǵynda 8 memleketke 1 193,4 tonna balyq ónimi jóneltilgen. Óńirde 11 balyq óńdeý zaýyty bolsa, sonyń 4-i Eýropalyq odaq elderine óz ónimderin eksporttaı alady. Eksporttalatyn sý marjandarynyń qatarynda tyran, torta, alabuǵa, shortan men kókserke bar.

– Oblys aýmaǵynda Kishi Aral teńizi, Syrdarııa ózeni jáne balyq sharýashylyǵy úshin mańyzdy 201 kól bar. Onyń ishinde Kishi Aral teńizi tolyqtaı jáne 164 kól tabıǵat paıdalanýshylarǵa konkýrstyq negizde jalǵa berilgen. Al 37-si rezervtik qorda, - delingen basqarmanyń habarlamasynda. 

Kól-taýarly balyq sharýashylyǵynyń sany búginde 80-ge jýyqtady. Bıyl balyq ósirýshilerge balyq jemin satyp alý úshin oblystyq bıýdjetten jalpy shyǵynnyń 30%-yn sýbsıdııalaýǵa 10,1 mln teńge bólindi.

Aıta keteıik, Syrdarııa ózeninde, barlyq sý aıdynynda, sondaı-aq Kishi Aral teńizinde kóktemgi balyq resýrstary men basqa da sý janýarlarynyń ýyldyryq shashý jáne kóbeıý kezeńinde balyq aýlaýǵa ýaqytsha tyıym salyndy.