Aral turǵyny úıiniń aldyndaǵy eski saraıdy mýzeıge aınaldyrǵan
QYZYLORDA. KAZINFORM – Qyzylorda oblysynyń Aral aýdanynda úıiniń aldyndaǵy eki bólmeli eski saraıdy mýzeıge aınaldyrǵan azamat turady.
Keıipkerimiz Nurjan Іzdibaev memlekettik qyzmet salasynda jumys isteıdi. Eski dúnıege áýestigi eki jyl buryn atasy men ájesi tutynǵan zattardy jınaýdan bastalǵan.
Búginde mýzeı (bul jerde biz «mýzeı» dep shartty túrde atap otyrmyz) qoryndaǵy jádigerler sany myńǵa jetti. Kóbine týǵan-týys, dos-jaran, áriptesteri qolǵa túskenin beredi eken. Al endi bir bóligin áleýmettik jelidegi oqyrmandary syıǵa tartqan.
– TikTok paraqshamda 24 myńdaı jazylýshy bar. Tikeleı efırde hobbıim týraly aıtyp, kópshilikke qordaǵy dúnıelerdi kórsetemin, tanystyramyn. Plastınka, kassetaǵa jazylǵan retro ánderdi tyńdatyp, kasseta, DVD dıskige jazylǵan vıdeolardan úzindi salyp otyramyn. Soǵan qyzyǵýshylyq bildirip, tanymasa da qolynda bar eski dúnıelerdi syılyqqa berip jibergender az emes, - dedi Nurjan Іzdibaev.
Mýzeı jádigerleriniń ishindegi eń kónesi – Reseı ımperııasy kezinde qoldanylǵan 1725 jyly shyqqan tıyn. Odan bólek 1973 jyly shyqqan shańsorǵysh, 1978 jyly shyqqan teledıdar, shahterlar qoldanǵan 1950 jylǵy telefon bar.
– Teledıdardy úıdegiler atam bar kezde paıdalanǵan eken. Al temir telefondy shahtada tótenshe jaǵdaı kezinde dabyl qaǵý, habar berý maqsatynda qoldanǵan. Ony ózim sııaqty kollektsıonerden 30 myń teńgege satyp aldym. Eń qymbatqa satyp alǵanym — ázirge osy, - dedi mýzeı ıesi.
Munda maısham, magnıtofon, útik, úı telefony, uıaly telefon, kartınka, taǵy basqa zattardyń túr-túri bar.
Ájesiniń artynan kelgen sandyqty, ol kisi tutynǵan kebeje, asadal, dıirmendi de nemeresi kóziniń qarashyǵyndaı saqtap keledi.
Keıipkerimiz burnaǵy jylǵy eńbek demalysyn jınaǵan dúnıeleriniń shańyn súrtýge, olardy oryn-ornyna qoıýǵa arnaǵan. Munyń ózi – kóp ýaqytty qajet etetin jumys.
– Áli ár zattyń tusyna tarıhy, shyqqan jyly, qaıdan, kimnen alǵanym týraly qysqasha málimet jazyp qoıýym kerek. Oǵan kóbine múmkindik bola bermeıdi. Qyzyǵýshylyqpen bastaǵan isime áke-sheshemnen bastap áriptesterime deıin túsinistikpen qaraıdy, qoldaıdy. Qolǵa túsken qundy dúnıelerdi ákep berip, qorǵa úles qosady, - dedi kollektsıoner.
Jergilikti mýzeıden habarlasyp, jádigerden úles suraǵandar bolypty. «Ózimnen artylsa, berýge daıynmyn», - deıdi Nurjan Іzdibaev.
Buǵan deıin biz Qyzylordadaǵy jalǵyz shirkeý buryn mýzeı bolǵanyn jazǵanbyz.