Arakchı: Iran ıadrolyq baǵdarlamadan bas tartpaıdy

ASTANA. KAZINFORM – Iran Izraılmen soǵystan keıin de ıadrolyq baǵdarlamasynan bas tartpaıdy. Bul týraly Irannyń Syrtqy ister mınıstri Abbas Arakchı Al-Araby al-Jadeed basylymyna bergen suhbatynda málimdedi, dep habarlaıdy Report.

Arakchıdiń aıtýynsha, Izraılmen 12 kúnge jalǵasqan qaqtyǵystan keıin Tegeran burynǵydan da batyl qadamǵa barýǵa bel býdy.

— Biz bul tehnologııaǵa orasan zor qarjy men kúsh jumsadyq. Ǵalymdarymyz qaza tapty, halqymyz sanktsııalarǵa tózip keledi, bizge soǵys ta ashyldy. Iranda eshkim bul baǵdarlamadan bas tartpaıdy. Ol árqashan Atom energııasy jónindegi halyqaralyq agenttiktiń (MAGATE) baqylaýynda boldy, — dedi Arakchı.

Aıta keteıik, buǵan deıin Masýd Pezeshkıan «Izraıl bitim shartyn saqtasa, Iran da ony buzbaıtynyn» málimdegen bolatyn.