Arab «shengeni» jaqyn arada iske qosylady

ASTANA. KAZINFORM — BAÁ ekonomıka mınıstri Abdalla ben Týka ál-Marrıdiń málimdeýinshe, Parsy shyǵanaǵy elderine ortaq biryńǵaı týrıstik vıza maquldanyp, jaqyn arada engizilmek. 

AZƏRTAC sheteldik BAQ-qa silteme jasap habarlaǵandaı, bul bir rettik biryńǵaı vıza sheteldik týrısterge Parsy shyǵanaǵy arab memleketteri yntymaqtastyǵy keńesine (PShAMYK) múshe barlyq alty elge – BAÁ, Saýd Arabııasy, Bahreın, Katar, Oman jáne Kýveıtke – bir ǵana qujatpen kirýge múmkindik beredi. Bul jańalyq óńirdiń týrızm salasy úshin úlken ilgerileý retinde baǵalanyp otyr. Sarapshylardyń pikirinshe, ol jańa jumys oryndaryn ashyp, JІÓ-niń ósýine aıtarlyqtaı úles qosa alady.

Biryńǵaı vızanyń engizilýimen iskerlik jáne demalys saparlaryn biriktiretin aralas saıahattardyń tanymaldyǵy artady dep kútilýde. Týrıster endi tek iskerlik máselelerdi sheship qana qoımaı, kórshiles elderdi de aralap, saparlaryn mazmundy ári qyzyqty ete alady.

Parsy shyǵanaǵy arab memleketteri yntymaqtastyǵy keńesiniń Statıstıkalyq ortalyǵynyń derekteri boıynsha, 2023 jyly óńirge 68,1 mıllıon qonaq kelgen. Týrızmnen túsken tabys 10,4 mıllıard dollar bolyp, pandemııaǵa deıingi 2019 jylmen salystyrǵanda 42,8%-ǵa artqan.

Dúnıejúzilik saıahat jáne týrızm keńesiniń (WTTC) derekterine sáıkes, BAÁ-de týrızm sektorynyń ekonomıkaǵa qosqan úlesi artyp keledi. Bul salada 2023 jyly 833 myń adam jumys istegen. 2030 jylǵa qaraı bul kórsetkish 1 mıllıonnan asady dep josparlanyp otyr. Osylaısha, eldegi ár toǵyzynshy adam qonaqúı jáne týrızm salasynda eńbek etetin bolady.

Óńirdiń basty týrıstik ortalyǵy sanalatyn Dýbaı 2025 jyldyń alǵashqy tórt aıynda 7,15 mıllıon týrıst qabyldady. Bul 2024 jyldyń osyndaı kezeńimen salystyrǵanda 7%-ǵa kóp.

Aıta ketelik Marokko 7,2 mıllıon týrıst qabyldap, jańa rekord ornatty.