Arab kompanııasy Geely-Renault birikken kásipornynyń 10 paıyzyn satyp alady. Mámile nesimen qyzyq
ASTANA. KAZINFORM — Saýd Arabııasynyń Saudi Aramco munaı óndirýshi kompanııasy maýsym aıynyń sońynda frantsýz avtomobıl óndirýshisi Renault men qytaılyq Geely kompanııasynyń jylý qozǵaltqyshtaryn shyǵaratyn birlesken kásiporny — Horse Powertrains-tiń 10 paıyzdyq úlesin satyp alý týraly túpkilikti kelisimge qol qoıdy. Kazinform agenttiginiń tilshisi bul mámileniń qanshalyqty qyzyq ekenin taldap kórýge tyrysty.
Aramco ınvestıtsııasy qandaı maqsatqa jumsalmaq
Aramco munaı óndirýshi kompanııasynyń málimdemesine sáıkes, eki kompanııa da — frantsýzdyń Renault Group pen qytaılyq avtoóndirýshi Geely Auto Group ortaq kásiporyndaǵy árqaısysynyń 45 paıyzdyq aktsııalaryn teńdeı úleste saqtap qalady.
Qazirgi ýaqytta mámileni jabý úshin retteýshi organdar tarapynan maquldaý kútilip otyr. Aramco kásiporynnyń 10 paıyz aktsııasyna tólem jasamaq. Bul 740 mıllıon eýrony quraıdy.
Horse Powertrains Limited kompanııasynyń jalpy quny 7,40 mıllıard eýroǵa (7,93 mıllıard dollar — red. eskertesi) baǵalanady. Kásiporyn gıbrıdti jáne gazben júretin kólikterge arnalǵan ekologııalyq taza qozǵaltqyshtardy ázirleıdi.
«Investıtsııa utqyrlyqtyń barynsha tıimdi sheshimderin ázirleý jáne kommertsııalandyrý arqyly Aramco-nyń jahandyq energetıkalyq kóshýge qosqan úlesin arttyrýǵa baǵyttalǵan», — dep habarlady Saýd Arabııasynyń baspa agenttigi.
Sonymen qatar mámile Aramco men Valvoline arasyndaǵy Horse qozǵaltqyshtaryn jetildirýge arnalǵan tehnologııalardy, janarmaı men maılaý materıaldaryn ázirleý boıynsha seriktestik kelisimderdi qamtıdy.
«Aramco ınvestıtsııasy búkil álemde qoljetimdi, tómen kómirtekti ishki janý qozǵaltqyshtaryn tıimdi ázirleýge jáne engizýge tikeleı yqpal etedi dep kútiledi. Geely jáne Renault-men birge biz ujymdyq tájirıbemiz ben resýrstarymyzdy qozǵaltqysh pen janarmaı tehnologııasy salasyndaǵy jańashyldyq jetistikterin qoldaýǵa paıdalanýdy josparlap otyrmyz», — dedi Aramco kompanııasynyń tehnologııalar jáne ınnovatsııalar jónindegi atqarýshy vıtse-prezıdenti Ahmad O.Al-Hovaıter.
Degenmen, Horse Powertrain kompanııasy Aramco ınvestıtsııalary onyń ósýin qoldaıtynyn jáne básekege qabiletti sıntetıkalyq otyn negizindegi qýat qondyrǵylary men sheshimderdi damytýǵa yqpal etetinin málimdep otyr.
Avtomobıl ónerkásibine qosqan úles
Aramco, Renault Group jáne Geely avtomobıl ónerkásibi ártúrli tehnologııalardyń úılesimin qajet etedi degen ortaq pikirge kelip otyr.
Aramco, Geely jáne Renault kompanııalary Horse-pen birlesip, avtomobıl ónerkásibinde tıimdiligi joǵary ishteı janý qozǵaltqyshtaryn, gıbrıdti qýat qondyrǵylaryn, sondaı-aq dekarbonızatsııany tıimdi yntalandyrý úshin sýtegi men sıntetıkalyq otyndy qosa alǵanda ártúrli qýat agregattary tehnologııalarynyń kombınatsııasyn qurýdy josparlap otyr.
Horse Powertrain kompanııasy gıbrıdti jáne otyn-energetıkalyq júıelerdi óndirýdiń barlyq ómirlik tsıklin jobalaýdan, ázirleýden bastap, sońǵy qozǵaltqyshtardy, berilis qorabyn, gıbrıdti mehanızmderdi jáne batareıalardy paıdalana otyryp óndirýge deıin basqaratyn bolady.
Renault kompanıaısynyń bas dırektory Lýka de Meo bul mámileni ishki janý qozǵaltqyshtary men gıbrıdti tehnologııalardyń bolashaǵyn «qaıta oı eleginen ótkizetin» «armandaýshylar komandasyn» qurý dep sıpattady.
Dástúrli avtomobıl qurdymǵa ketip júrmeı me?
Qazirgi ýaqytta Horse Powertrain kompanııasy elektromobılder satylymynyń tómendeýi aıasynda dástúrli avtomobıl óndirýshilerine jetkizý bıznesin keńeıtip jatqanyn alǵa tartady.
Kompanııanyń boljamyna sáıkes, álemde shyǵarylatyn kólik quraldarynyń 50 paıyzdan astamy, tipti 2040 jylǵa qaraı da ishteı janý qozǵaltqyshtaryn qoldana beretin bolady.
Naryqta ne bolyp jatyr?
Birlesken kásiporynǵa ınvestıtsııa suranys pen óndiris shyǵyndarynyń ósýine baılanysty týyndaǵan álemdik elektromobıl naryǵyndaǵy problemalar aıasynda túsip otyr.
Buǵan qosa, maýsym aıynda Eýropa komıssııasy shildeden bastap-aq ımporttalatyn qytaılyq elektromobılderge 38,1 paıyzǵa deıin qosymsha baj salyǵyn engizetinin málimdegen bolatyn.
Reuters agenttiginiń habarlaýynsha, maýsym aıynda aktsııalaryn qaıta satý arqyly shamamen 11,2 mlrd dollar qarjy tartqan Aramco kompanııasy bastapqyda Horse Powertrain aktsııalarynyń 20 paıyzyn satyp alatyndyǵyna emeýirin tanytqan.
Saýd Arabııasynyń munaı kompanııasy ótken jyldyń ózinde birlesken qytaı-frantsýz kásipornyna qatysýdy josparlaǵany aıtylady.
2023 jyldyń naýryzynda Saudi Aramco kásiporynnyń mınorıtarlyq aktsıoneri mártebesin alý maqsatynda nıet hatyna qol qoıǵan.
Bul rette aıta keterligi, Horse Powertrain kompanııasy 2024 jyldyń 31 mamyrynda qurylyp, tirkelgen bolatyn. Shtab-páteri Ulybrıtanııa astanasy — London qalasynda ornalasqan.
«Aramco-nyń birlesken jylý qozǵaltqyshy kásipornyndaǵy úlesi elektromobılderge kóshý kezeńinde saqtandyrý sebetin qamtamasyz etý arqyly dástúrli avtomobıl óndirýshilerge ınvestıtsııany turaqtandyrýy yqtımal», — dep málimdedi Finimize ınvestıtsııalyq platformasy.
Tańqalarlyq nátıje
Horse Powertrain kompanııasynyń jyldyq kirisi jylyna 5 mıllıon birlik qýat agregaty óndiristik qýatymen 16,2 mıllıard dollarǵa jetedi dep kútilýde. Bul búkil álem boıynsha seriktester úshin aldyńǵy qatarly qýat agregattarynyń aldyńǵy qatarly tehnologııalarynyń tolyq qorjynyn qamtıdy.
«2024 jyldyń birinshi toqsanynda Renault Group-tyń kirisi 1,8 paıyzǵa ósip, 12,5 mıllıard dollarǵa jetti. Mundaı jaıt qarjylyq bıznestegi turaqty kórsetkishterdiń arqasynda avtomobıl bólimshesi kirisiniń tómendeýin óteý arqyly oryn aldy», — dep habarlady Forbes Middle East kompanııanyń málimdemesine silteme jasap.
2024 jyldyń birinshi toqsanynda Geely Holdings-tiń barlyq avtomobıl brendteri boıynsha satylymy jyldyq mánde 27 paıyzǵa ósip, 738 400 birlikke jetti.
