Arab kompanııasy Astana áýejaıynyń jumysyn qolǵa aldy
Astana halyqaralyq áýejaıy ınvestor Terminals Holding kompanııasymen birlesken jumysty bastady, dep habarlaıdy Kazinform agenttigi Astana áýejaıynyń baspasóz qyzmetine silteme jasap.
18 qazanda QR Premer-Mınıstri Álıhan Smaıylovtyń Túrkistan oblysyna jumys sapary barysynda Terminals Holding kompanııasymen yntymaqtastyq týraly kelisimge qol qoıǵan bolatyn. Negizgi maqsat – Astana áýejaıyn mýltımodaldi hab retinde damytý, ınvestıtsııa quıý arqyly ushý-qoný jolaǵyna kúrdeli jóndeý jasaý, júk termınalynyń qýattylyǵyn jáne jolaýshylar aǵynyn arttyrý.
«8 qarashada sheteldik ınvestor BAÁ-niń Terminals Holding kompanııasy men Astana halyqaralyq áýejaıy arasyndaǵy birlesken jumys bastaldy. Búgin sheteldik ınvestor Astana halyqaralyq áýejaıynyń seriktesterine, áýe kompanııalaryna ózderin tanystyryp, aldaǵy josparlarymen bólisti», - dep jazylǵan Astana áýejaıynyń resmı habarlamasynda.
Astana halyqaralyq áýejaıynyń ushý-qoný jolaǵy saǵatyna 20 ushý jáne qoný operatsııasyn oryndaýǵa múmkindik beredi.
Al júk termınalynyń aýmaǵy 3,3 myń sharshy metrdi quraıdy. Astana halyqaralyq áýejaıy jylyna 11 myń tonna júkti qabyldaý jáne jóneltý jumysyn júrgizip keledi.
«Aıta ketý kerek, ortaq kelisim ázirge 1 jylǵa qarastyrylǵan. Bir jyl kóleminde ınvestor Astana áýejaıynyń áleýetin zerdelep, múmkindikterin qarastyrady. Sodan keıin naqty ınvestıtsııa kólemi men uzaq merzimdi kelisimshart jasasý máselesi qarastyrylady», - deıdi áýejaı.
Terminals Holding kompanııalar toby – Azııa men Afrıkanyń iri naryqtarynda tutynýshylarǵa qyzmet kórsetetin, sondaı-aq Abu Dhabi Ports iri portty jáne ónerkásip kompanııasymen baılanysty qarqyndy damyp kele jatqan avıatsııalyq kásiporyn.
