Jyl saıyn Urker-diń óz jańalyǵy bolady – Aıda Balaeva
Elordada BAQ ókilderi arasyndaǵy dástúrli Urker-2023 baıqaýynyń jeńimpazdaryn jarııalaýǵa arnalǵan saltanatty shara ótip jatyr, dep habarlaıdy QazAqparat tilshisi.
«Memleket basshysy Túrkistanda ótken ulttyq quryltaıda mass-medıanyń mańyzyn erekshe atap ótti. BAQ salasy únemi Prezıdenttiń nazarynda, erekshe baqylaýynda. Bıyl aqparat salasynda birqatar qujattar qabyldanǵan jyl boldy. Eń bastysy, memlekettik aqparattyq saıasattyń negizin aıqyndaıtyn qujat – Doktrına qabyldandy. Qoǵam úshin onyń ishinde óskeleń urpaqty aqparat qaýipsizdigi turǵysynan qorǵaýǵa baǵyttalǵan zańdy bekittik», – dedi Mádenıet jáne aqparat mınıstri Aıda Balaeva saltanatty sharanyń ashylýynda.
Vedomstvo basshysynyń aıtýynsha, BAQ salasynda qabyldanyp jatqan jańashyldyqtar el ıgiligine qyzmet etetin bolady.
«Sońǵy birneshe kún boıy Astana Media Week sharasy aıasynda medıa salasy máseleleri jan-jaqty talqylandy. Oǵan otandyq jáne sheteldik úzdik sarapshylar qatysty. Aıtýly sharanyń qorytyndysy retinde Urker syılyǵy ótip jatyr. Ár jyl saıyn Urker-diń óz jańalyǵy bolady. Bıyl baıqaýǵa 3 jańa nomınatsııa qosyldy. Biz jańa ári kreatıvti medıanyń damýyna árqashan qoldaý kórsetemiz», –deıdi mınıstr.
A.Balaevanyń málimetinshe, bıyl konkýrsqa qatysýǵa rekordtyq kólemde – 450 ótinim tústi. Osy ýaqytqa deıin jalpy 74 BAQ ókili baıqaý jeńimpazy atanǵan.
«Tańdaý ońaı bolǵan joq. Degenmen, bizdiń qazylar alqasy óz sheshimimen úzdikterdiń úzdigin anyqtaǵanyna senimdimiz. Olardyń árqaısysyna qajyrly eńbegi úshin bólek alǵys aıtamyn», – dedi Mádenıet jáne aqparat mınıstri.
