Ár teńge tórt eselep qaıtady: Vıtse-premer munaı-hımııa tehnoparki týraly
Vıtse-Premerdiń málimeti boıynsha, Qazaqstanda gomopolımerler men sopolımerlerdiń 70-ten astam markasy shyǵarylýy múmkin. Bul týraly ol depýttatyq saýalǵan bergen jaýabynda aıtty.
«Búgingi tańda «Ulttyq ındýstrııalyq munaı-hımııa tehnoparki» AEA aýmaǵynda 10 qatysýshy tirkelgen. Onyń ishinde 1 joba paıdalanýǵa berildi. 2015 jyly «Polımer Prodakshn» JShS polımerlik ónim óndirý jobasyn qolǵa alǵan bolatyn. Taǵy 3 joba qurylys satysynda jáne qalǵan jobalar jobalaý satysynda. 2021 jylǵy 31 naýryzdaǵy jaǵdaı boıynsha polıpropılen óndiretin gaz-hımııa kesheniniń jalpy qýaty jylyna 500 myń tonna jáne quny 2,6 mlrd. AQSh dollaryna teń. Osy joba iske qosylǵannan keıin ishki qajettilik pen eksportty tolyq qamtamasyz etýge múmkindik beretin gomopolımerler men polımertektes ónimderdiń 76 markasy shyǵarylatyn bolady», - dep jazdy Roman Sklıar depýtattyq saýalǵa bergen jaýabynda.
Sondaı-aq, ol «UIMT» AEA bazasynda gaz týrbınaly elektr stantsııasyn salý, sý daıyndaý jáne aǵyndy sýlardy tazartý qondyrǵylarynyń óndirisi, tehnıkalyq gaz óndirý qondyrǵylaryn jasaý sııaqty birneshe joba kiretin kiretin óndiristik ınfraqurylymynyń qurylysy bitýge jaqyn qalǵanyn aıtady.
«Munaı-gaz hımııasymen baılanysty jobalar qomaqty kapıtaldy qajet etetin jáne tehnıkalyq jaǵynan kúrdeli bolyp keletiin atap ótken jón. Bul belgili bir jumys túrlerin júrgizýdi, onyń ishinde qarjylandyrýdy tartý, shıkizatpen qamtamasyz etý, lıtsenzııalyq tehnologııa alý, qajetti ınfraqurylymmen qamtamasyz etý jáne daıyn ónimdi ótkizý kózderi tabý sııaqty jumystardy talap etedi. Osy jumystardy júrgizgennen keıin ǵana atalǵan zaýyttardy jobalaý jáne salý múmkin bolady. Bul kóp ýaqyt alady», - deıdi vıtse-Premer.
Roman Sklıar Memleket basshysynyń tapsyrmasy boıynsha «UIMT» AEA qyzmetiniń tıimdiligin arttyrýǵa kóńil bólingenin eske saldy.
«UIMT» AEA-da bazalyq ónimdi qaıta óńdeý boıynsha jańa kásiporyndar qurýdy yntalandyratyn klasterlik tásildi qoldaný usynylyp otyr. Jalpy, atalmysh arnaıy ekonomıkalyq aımaqtyń ınfraqurylymyna bıýdjetten salynǵan 1 teńge shamamen 4 teńge jeke ınvestıtsııa tartýǵa múmkindik berdi», - dedi Premer-Mınıstrdiń orynbasary.
Resmı málimetke súıensek, «UIMT» AEA jumys isteı bastaǵannan beri ónim óndirý kólemi shamamen 22 mlrd teńgege jetken. Onyń ishinde eksport kólemi 15,3 mlrd teńge bolǵan. Jobalarǵa salynǵan 830 mlrd teńge ınvestıtsııanyń 668 mlrd teńgesi jeke menshikten tartylǵan. Sonyń arqasynda 3,5 myńǵa jýyq turaqty jáne ýaqytsha jumys orny ashylǵan.
