Ár naýqasqa birinshi kezekte meıirim qajet - medbıke

TALDYQORǴAN. QazAqparat – Búgin Halyqaralyq medbıkeler kúni. Taldyqorǵandaǵy oblystyq kópsalaly onkologııalyq klınıkada medbıke bolyp isteıtin Qundyz Bekturova ár naýqasqa birinshi kezekte meıirim qajettiligin aıtady.

Kóp jyl medbıke bolyp istep kele jatqan Qundyz Bekturova ózi qatysqan alǵashqy operatsııany eske aldy. Onyń aıtýynsha, naýqastyń sol kezde asqazanyn tolyqtaı alyp tastaǵan.

«Ol otanyń jasalǵanyna da 22 jyl ótti. Alǵash ret jumysqa ornalasqan kezim edi. Jazylmaıtyn dertke shaldyqqan naýqastyń tolyqtaı asqazanyn kóz aldymda alyp tastady. Árıne otada qatty qoryqtym.Kúrdeli ota bolǵandyqtan naýqas ómir súrmeıtin shyǵar degen oı keldi. Biraq, men qatelesippin. Otadan keıin ol adam 15 jyl ómir súrdi. Sondyqtan qaterli isikke shaldyqqan jandar birden kúızeliske túspese eken dep tileımin. Sebebi, der kezinde dárigerge qaralsa, dertpen kúresýge bolady», - deıdi Qundyz Bekturova.

Qundyz ol kezde nebári 23 jasta ǵana bolypty. Tabandylyq, jumysyna degen súıispenshiliktiń arqasynda ol onkologııalyq klınıkada 22 jyldan beri istep keledi.

«Qaterli isik jaıly bilgende naýqastardyń basym bóligi birden kúızelike túsedi. Jylaıdy. Qınalady. Sol kezde biz olarǵa emdik sharalarmen qatar, psıhologııalyq kómek te kórsetemiz. Ár naýqastyń saýyǵyp ketýin tileýmen júremiz. Árıne múndaı jerde jumys isteý ońaı emes. Kóz aldymyzda olar ómir men ólim arasynda arpalysady. Hımııa alǵan sátte jandary qınalǵan naýqastardyń shashy túsip, denelerinde isik te paıda bolyp jatady. Biraq olar ómir úshin kúresip, dertti te kóp jaǵdaıda jeńip shyǵady. Eń bastysy úmit úzilmeý kerek dep sanaımyn. Ár adam óz densaýlyǵyna nemquraıdy qaramasa dep tileımin», - dedi jany meıirimge toly medbıke.

Qundyz Altaıqyzy jumys isteıtin jerde 80-ge jýyq medbıke bar. Ol bas medbıke qyzmetin atqarady. Ár mamanǵa jumysqa meıirimdilikpen qaraý kerektigin jıi qaıtalaımyn deıdi.

«Bizde basqa aýrýhanalardaǵydaı emes, jaǵdaı basqasha. Qaterli isikke shaldyqqan jandardy emdeımiz. Sol sebepti, medbıkelerden ár kez óz jumystaryna shydamdylyq tanytýdy suraımyn. Sebebi, ár naýqasqa birinshi kezekte meıirim qajet. Tipti keıde emdik sharalardan bas tartyp, bizdi uryp jiberetin de sátter bolady. Onyń barlyǵyna tek túsinistik tanytamyz», - dedi Q. Altaıqyzy.

Qundyz Bekturova Taldyqorǵandaǵy buryńǵy medıtsınalyq ýchılışeni (qazir ataýy Medıtsınalyq kolledj) bitirgen. Qazir eki balanyń anasy. Qyzy Almaty oblystyq ekologııa depatamentinde bas maman bolyp jumys isteıdi. Al uly Almatydaǵy «Narhoz» ýnıversıtetiniń 3-shi kýrs stýdenti.

Almaty oblysyndaǵy Aqsý aýdanyna qarasty Mataı aýylynda dúnıege kelgen medbıke ár maman jumysta tabandylyq tanytý kerek degen ustanymda. Sonda eńbektiń de jemisti bolatynyna ol senimdi. Qundyz Bekturova qazir ózi bilim alǵan shańyraqta da stýdentterge dáris oqyp, bilimdi urpaq tárbıeleýge óz úlesin qosýda.