Ár muǵalimniń tsıfrlyq portfolıosy engiziledi - Aımaǵambetov

ASTANA. QazAqparat – Ortalyqtandyrylǵan balabaqshalarǵa biryńǵaı kezek engiziledi. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Oqý protsesin tsıfrlandyrý aıasynda arnaıy jobalar iske asyrylady. Búgingi tańda balabaqshalarǵa kezek tsıfrly formatqa kóshirildi. Degenmen, áli de úlken másele bar, kezekke qoıý boıynsha oblystarda 44 aqparattyq túrli júıe paıdalanylady, birizdilik joq, táýekelder bar. Osy máseleni sheshý maqsatynda ortalyqtandyrylǵan balabaqshalarǵa biryńǵaı kezek engiziledi. Bul turǵyda balabaqshalardaǵy kezekke turýdy, berilgen joldamalardy baqylaýǵa, oryndardy bólý kezinde táýekelderdi boldyrmaýǵa múmkindik jasalady», - dedi A. Aımaǵambetov.

Onyń aıtýynsha, ár pedagogtiń tsıfrlyq portfolıosy engiziledi. Osy oraıda onyń attestatsııasy, jumysqa qabyldaý rásimi, konkýrstarǵa qatysýy, jetistikteri jáne barlyq aqparaty sol júıege júktelip, elektrondy formatta bolady.

Budan buryn habarlanǵandaı, balabaqshalarda balalardy erte damytýdyń jańa modeli engizilip jatyr. Osy oraıda ondaǵy baǵdarlama da, oqytý ádisteri da túbegeıli ózgeredi.

Sonymen qatar, mektepterge arnalǵan jańa memlekettik standarttar men oqý baǵdarlamalary ázirlenip jatyr.

Búgin Úkimet otyrysynda bilim berýdi damytýdyń 2026 jylǵa deıingi tujyrymdamasynyń jobasy bekitildi.