Aptadaǵy aýys-túıis: Kimderge qyzmet buıyrdy
ASTANA. KAZINFORM – Ótken aptada elimizde birqatar kadrlyq aýys-túıis boldy. Jańa qyzmetke taǵaıyndalǵan basshylar senim údesinen shyǵyp, abyroıly qyzmet etýge ýáde berip otyr.
Almaty oblysy ákiminiń ókimimen Aıdyn Begimbekov oblystyq energetıka jáne turǵyn úı kommýnaldyq sharýashylyǵy basqarmasynyń basshysy laýazymyna taǵaıyndaldy.
Aıdyn Begimbekov 1990 jyly Jetisý oblysy Panfılov aýdanynda dúnıege kelgen, bilimi joǵary, 2012 jyly Abaı atyndaǵy Qazaq ulttyq pedagogıkalyq ýnıversıtetin «halyqaralyq qatynastar» mamandyǵy boıynsha, 2014 jyly Ortalyq Azııa ýnıversıtetin «qurylys» mamandyǵy boıynsha bitirgen.
Eńbek jolyn «Korporatsııa Arkada» JShS dırektorynyń orynbasary bolyp bastaǵan.
Ár jyldary Almaty qalasy qurylys basqarmasynyń áleýmettik nysandar qurylysy bóliminiń bas mamany, basshysy, Almaty qalasy Jaıly qalalyq orta basqarmasynyń áleýmettik nysandardyń kúrdeli qurylysy bóliminiń basshysy, Astana qalasynyń qorshaǵan ortany qorǵaý jáne tabıǵatty paıdalaný basqarmasy basshysynyń orynbasary, Abaı oblysy qurylys, sáýlet jáne qala qurylysy basqarmasynyń basshysy bolyp jumys istedi.
2024 jyldyń aqpan aıynan bastap Abaı oblysy qurylys basqarmasynyń basshysy laýazymynda qyzmet etti.
Álibek Áldeneı Qaraǵandy oblysy ákiminiń orynbasary bolyp taǵaıyndaldy
Áldeneı Álibek Úsenuly 1984 jyly Túrkistan oblysynda dúnıege kelgen.
Úsh joǵary bilimi bar: ál-Farabı atyndaǵy Qazaq ulttyq ýnıversıtetin saıasattanýshy mamandyǵy boıynsha, Qaraǵandy qarjy ınstıtýtyn qarjyger mamandyǵy boıynsha, QR Prezıdentiniń janyndaǵy Memlekettik basqarý akademııasynyń magıstratýrasyn bitirgen.
Eńbek jolyn 2006 jyly Qazaqstan Respýblıkasy Aqparat jáne sport mınıstrligi Aqparat jáne muraǵattar komıteti BAQ departamentiniń BAQ monıtorıngi bóliminiń jetekshi mamany bolyp bastady. 2006-2010 jyldar aralyǵynda Qazaqstan Respýblıkasy Mádenıet jáne aqparat mınıstrliginde túrli laýazymdarda qyzmet atqarǵan.
2010 jyldan 2013 jylǵa deıin «2011 jylǵy 7-shi qysqy Azııa oıyndarynyń atqarýshy dırektsııasy» AQ marketıng saıasaty jónindegi bas menedjeri, «Halyqaralyq baǵdarlamalar ortalyǵy» AQ joba bóliminiń menedjeri, aqparattyq-taldaý bóliminiń bas menedjeri boldy.
2015 jyly «Ońtústik astana» teleradıokompanııasy» AQ bas dırektory bolyp taǵaıyndaldy. 2019 jyldan bastap AMANAT partııasynyń Astana qalasy boıynsha hatshysy, 2023 jyldan osy ýaqytqa deıin Qazaqstan Respýblıkasy Prezıdenti Ákimshiliginiń kommýnıkatsııalar bólimi meńgerýshisiniń orynbasary qyzmetin atqardy.
2024 jyldyń 1 shildesinen bastap Qaraǵandy oblysy ákiminiń áleýmettik máseleler, ishki saıasat jáne áleýmettik damý jónindegi orynbasary bolyp taǵaıyndaldy.
Oblys ákiminiń orynbasary retinde Qaraǵandy oblysynyń bilim, ishki saıasat, tilderdi damytý, jastar saıasaty, din isteri, mádenıet jáne sport máselelerin qadaǵalady.
Gaýhar Tasbergenova Qurmanǵazy atyndaǵy Qazaq ulttyq konservatorııasynyń rektory bolyp taǵaıyndaldy. Bul týraly Mádenıet jáne aqparat mınıstrliginiń baspasóz qyzmeti habarlady.
Gaýhar Tasbergenova – belgili qazaqstandyq pıanıst, kontsertmeıster, art-menedjer halyqaralyq konkýrstardyń laýreaty. Ol K.Baıseıitova atyndaǵy mektepti bitirgen, PhD in Art-management doktory.
Gaýhar Tasbergenova ár jyldary halyqaralyq jobalarǵa qatysqan, atap aıtqanda, Frantsııanyń Qazaqstandaǵy Elshiliginiń qatysýymen «Parıj-Astana: Debıýssıden Jubanovaǵa deıin», A. Jubanov, L. Hamıdı «Abaı» (qoıýshy-rejısser Djankarlo del Monako), E. Brýsılovskıı «Qyz Jibek» (qoıýshy-rejısser Mıhaıl Pandjavıdze), sondaı-aq ol operalyq spektaklderdi súıemeldeıtin bas pıanıst-kontsertmeıster. Mádenıet salasyndaǵy kóptegen jobalardy ázirep, ony júzege asyrǵan.
Sonymen qatar Gaýhar Tasbergenova – Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń múshesi.
QR Úkimetiniń qaýlysymen Ardaq Amangeldiuly Amangeldıev Densaýlyq saqtaý vıtse-mınıstri qyzmetine taǵaıyndaldy. Bul týraly Úkimettiń baspasóz qyzmeti habarlady.
Ol 1975 jyly dúnıege kelgen. Bóketov atyndaǵy Qaraǵandy memlekettik ýnıversıtetin bitirgen. Sondaı-aq Lı Kýan ıÝ atyndaǵy mektep pen D.Kennedı atyndaǵy Garvard mektebiniń birlesken sheberlik baǵdarlamasyn (memlekettik basqarý boıynsha magıstr) oqyǵan.
Eńbek jolyn 1996 jyly Qaraǵandy oblystyq qarjy basqarmasynyń bas mamany bolyp bastady. Ártúrli jyldary Qarjy mınıstrliginde, Ekonomıka jáne bıýdjettik josparlaý mınıstrliginde, Densaýlyq mınıstrliginde, «Qazyna» turaqty damý qorynda, «Samuryq-Qazyna» ulttyq ál-aýqat qorynda, Ulttyq bankte, Premer-Mınıstrdiń keńsesinde jáne QR Prezıdentiniń Ákimshiliginde qyzmet etti.
2016-2023 jyldar aralyǵynda «Astana» halyqaralyq qarjy ortalyǵynda basqarýshy keńesshisi, AHQO basqarýshy dırektory bolyp jumys istedi.
Atalǵan mınıstrlikte strategııa, ekonomıka jáne qarjy máselelerine jetekshilik etedi.
