Apta ishindegi kadrlyq taǵaıyndaýlar

ASTANA. KAZINFORM – Ótip bara jatqan apta ishinde birqatar kadrlyq aýys-túıis oryn aldy.

Atap aıtqanda, Memleket basshysynyń ókimimen Asqar Mustabekov Qorǵanys mınıstriniń orynbasary bolyp taǵaıyndaldy. Ol buǵan deıin Ulttyq qorǵanys ýnıversıtetiniń bastyǵy qyzmetin atqarǵan. 

Qorǵanys mınıstriniń kommýnıkatsııalar jónindegi keńesshisi – resmı ókili qyzmetine Áıgerim Aǵyltaeva kiristi. 

Áıgerim Aǵyltaeva jýrnalıstıka salasyndaǵy kásibı bilimin Abylaı han atyndaǵy Qazaq halyqaralyq qatynastar jáne álem tilderi ýnıversıtetinde jáne KIMEP ýnıversıtetinde (magıstratýra) alǵan. Ál-Farabı atyndaǵy Qazaq ulttyq ýnıversıtetin bitirip, saıasattaný ǵylymdarynyń magıstri dárejesin ıelengen.

«Bolashaq» halyqaralyq stıpendııasy aıasynda Nıý-Iork kınoakademııasynda «Prodıýserlik» mamandyǵy boıynsha bilim alyp, AQSh-taǵy Djordjııa ýnıversıtetinde mýltımedıalyq jýrnalıstıka baǵytynda taǵylymdamadan ótken.

Eńbek jolyn KTK telearnasynda tilshi bolyp bastaǵan. Ár jyldary «Qazaqstan» respýblıkalyq teleradıokorporatsııasynda telejúrgizýshi jáne redaktor, prodıýser, «31 arnada» baǵdarlamalyq menedjer, «Almaty» telearnasynyń bas redaktory - departament dırektory, Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetiniń moderatory, «Jetisý» telearnasy bas dırektorynyń orynbasary, sondaı-aq Jetisý oblysy ákimi apparatynyń baspasóz hatshysy – baspasóz qyzmetiniń jetekshisi qyzmetterin atqarǵan.

Almaty polıtsııa departamentiniń jańa basshysy bolyp polıtsııa general-maıory Aıdyn Qabdýldınov taǵaıyndaldy. 

Aıdyn Qabdýldınov 1998 jyly Almaty zań ınstıtýtyn bitirgen. Ol ishki ister organdarynda qyzmetin Óskemen qalasy ІІB-niń tergeýshisi laýazymynan bastaǵan.

2000 jyldan bastap Almaty qalasynyń ishki ister bólimderinde qyzmetin jalǵastyrdy. 2004 jyldan bastap Almaty qalasy ІІD-niń ózindik qaýipsizdik basqarmasynda jumys istep, ár jyldary tergeýshi, jedel ýákil jáne bólim bastyǵy boldy.

2012 jyldan bastap basqarmanyń orynbasary laýazymyna taǵaıyndalsa, 2017 jyldan bastap sol basqarmany basqarǵan. Sonymen qatar ol Batys Qazaqstan oblysy polıtsııa departamentiniń ózindik qaýipsizdik basqarmasynyń basshysy laýazymynda da qyzmet atqarǵan.

2020 jylǵy 23 sáýirde Aıdyn Qabdýldınov Almaty polıtsııa departamentiniń orynbasary bolyp taǵaıyndaldy.

Al 2022 jylǵy qańtardan bastap Soltústik Qazaqstan oblysy polıtsııa departamentiniń basshysy qyzmetin atqardy. 

Sonymen qatar Polıtsııa general-maıory Aıdos Rysbaev Іshki ister mınıstrligi apparatynyń basshysy bolyp taǵaıyndaldy. Ol buǵan deıin Kóliktegi polıtsııa departamentin basqarǵan.

Polıtsııa general-maıory Murat Kabdenov Túrkistan oblysy polıtsııa departamentiniń bastyǵy qyzmetinen ІІM Ákimshilik polıtsııa komıtetiniń tóraǵasy laýazymyna taǵaıyndaldy.

Polıtsııa general-maıory Arystanǵanı Zapparov Almaty qalasy polıtsııa departamentiniń bastyǵy qyzmetinen Túrkistan oblysy polıtsııa departamentiniń bastyǵy bolyp aýysty.

Polıtsııa polkovnıgi Abaı Júsipov Aqtóbe oblysy polıtsııa departamentiniń bastyǵy qyzmetinen Soltústik Qazaqstan oblysy polıtsııa departamentiniń bastyǵy bolyp taǵaıyndaldy.

Polıtsııa general-maıory Qaıyrken Álıev Ulytaý oblysy polıtsııa departamentiniń bastyǵy qyzmetinen Aqtóbe oblysy polıtsııa departamentiniń bastyǵy laýazymyna aýysty.

Polıtsııa general-maıory Nurhat Orazbaev Atyraý oblysy polıtsııa departamentiniń bastyǵy qyzmetinen Ulytaý oblysy polıtsııa departamentiniń bastyǵy bolyp taǵaıyndaldy.

Polıtsııa general-maıory Ońal Bekıev ІІM Apparatynyń basshysy qyzmetinen Atyraý oblysy polıtsııa departamentiniń bastyǵy laýazymyna taǵaıyndaldy.

Rýslan Óskenáli «Qazaqmys korporatsııasy» JShS basqarma tóraǵasy qyzmetine kiristi.

Rýslan Óskenáli 1984 jyly týǵan. Ál-Farabı atyndaǵy Qazaq ulttyq ýnıversıtetin «Halyqaralyq quqyq» mamandyǵy boıynsha támamdaǵan, sondaı-aq Woodbury University joǵary oqý ornynda MBA dárejesin alǵan.

Kommertsııalyq jáne ónerkásiptik qurylymdardyń basqarýshylyq qyzmetinde tájirıbeci mol. Ár jyldary «Qazaqmys» korporatsııasy, Alstom jáne General Electric syndy iri halyqaralyq jáne ulttyq kompanııalarda basshylyq laýazymdarda qyzmet atqardy.

2024 jyldyń naýryz aıynan bastap Qarmet kompanııasynda jabdyqtaý jónindegi dırektor qyzmetin atqaryp, satyp alý fýnktsııasyn strategııalyq damytýmen jáne jabdyqtaý protsesin ońtaılandyrýmen aınalysty.

Sondaı-aq basqarma múshesi retinde kompanııanyń jalpy basqarýshylyq máseleleri boıynsha sheshimder qabyldaýǵa qatysqan.

Jalpy alǵanda, onyń kásibı joly iri kásiporyndardyń aktıvteri men operatsııalyq qyzmetin basqarý tájirıbesin, sondaı-aq strategııalyq jobalardy iske asyrýdy qamtıdy.

Rýslan Óskenáli tıimdiliktiń joǵary standarttaryna adaldyǵymen, korporatıvtik mádenıet qundylyqtaryn qurmetteýimen jáne uıym ishindegi kadrlyq potentsıaldy damytýǵa umtylýymen erekshelenedi.

Bokstan Qazaqstan erler quramasynyń bas jattyqtyrýshysy qyzmetine Nurjan Nasanov taǵaıyndaldy. 

Qazaqstan boks federatsııasynan málim etkenindeı, Nurjan Nıshanuly 1975 jyly dúnıege kelgen. 2016 jyly jattyqtyrýshy mansabyn bastaǵan. 2024 jyldyń tamyz aıynan ulttyq quramanyń jattyqtyrýshysy.

Eki dúrkin álem chempıony Sanjar Táshkenbaı jáne taǵy basqa boksshylardy tárbıelegen.

Al Baqyt Sársekbaev Qazaqstan jastar quramasynyń bas bapkeri qyzmetine taǵaıyndaldy.

Baqyt Abdrahmanuly 1981 jyldyń 29 qarashasynda dúnıege kelgen. 2008 jyly Beıjiń Olımpıadasynyń chempıony atansa, 2006 jyly Qatar astanasy Doha qalasynda Azııa oıyndarynyń jeńimpazy, úsh dúrkin Azııa chempıony boldy.

Tájirıbeli maman 2024 jyldyń jeltoqsan aıynan elimizdiń 22 jasqa deıingiler arasyndaǵy quramasynyń aǵa bapkeri qyzmetin atqarǵan edi. Federatsııa bul joba jumysyn toqtatatynyn málimdedi. Onda sheberligin shyńdaǵan boksshylar endi ulttyq qurama sapyna qosylady. 

Azız Anarmetov Ekinshi lıgada baq synaıtyn «Taraz» jastar komandasynyń bas bapkeri laýazymyna taǵaıyndaldy.

1982 jyly dúnıege kelgen Azız Abdrashıtuly Taraz qalasynyń týmasy. Fýtbolshy retinde kásibı mansabynda «Taraz», «Qaısar», «Oqjetpes», «Lashyn», «Qyzyljar» komandalarynda oınaǵan.

Al 2021 jyly «Taraz» jastar komandasynyń bas bapkeri bolyp qyzmet jasady.

Sondaı-aq, negizgi komanda bas bapkeriniń assıstenti retinde birneshe jyl eńbek etti.