Apta ishinde bolǵan kadrlyq taǵaıyndaýlar
ASTANA. KAZINFORM — Osy apta elimizde birqatar kadrlyq aýys-túıis boldy.
Apta aıaǵynda Áleýmettik medıtsınalyq saqtandyrý qoryna jańa basshy taǵaıyndaldy. Gúlmıra Sabdenbekti ujymǵa Qarjy mınıstrliginiń apparat basshysy Ernar Erjanov tanystyrdy.
G.Sabdenbek ár jyldary basshylyq qyzmet atqardy. Atap aıtqanda, Ulttyq medıtsınalyq holdıngtiń strategııalyq damý departamentine jetekshilik etti. Sonymen qosa «Ulttyq ǵylymı kardıohırýrgııalyq ortalyǵy» AQ basqarma tóraǵasynyń orynbasary boldy. Keıingi qyzmette QR Prezıdenti Ákimshiligi Áleýmettik-ekonomıkalyq saıasat bólimi meńgerýshisiniń orynbasary bolyp, áleýmettik saıasat jáne ornyqty damý, memlekettik aýdıt, sondaı-aq qarjylyq baqylaý máselelerimen aınalysqanyn atap ótken jón.
Budan bólek ujymǵa basqarma tóraǵasynyń birinshi orynbasary Aıdar Mekebekov tanystyryldy. Ol Qarjy mınıstrligi júıesinde uzaq jyl jumys istegen. Aıtalyq, salyq ınspektorynan bastap memlekettik kirister jáne qarjylyq baqylaý organdarynyń bólimshelerinde basshylyq qyzmet atqarǵan. Sol sekildi Qarjy monıtorıngi komıteti tóraǵasynyń orynbasary bolǵan.
Búginge deıin «Qazaqmys korporatsııasy» JShS-de urlyqqa qarsy is-qımyl jónindegi departament dırektory bolyp, eńbek etken.
Al Aıdar Mekebekov «Áleýmettik medıtsınalyq saqtandyrý qory» KeAQ basqarma tóraǵasynyń birinshi orynbasary bolyp taǵaıyndaldy. Ol Qarjy mınıstrliginde uzaq ýaqyt jumys istegen. Salyq ınspektorynan bastap memlekettik kirister jáne qarjylyq baqylaý organdarynda bólim basshysyna deıin kóterildi. Qarjy mınıstrliginiń Qarjylyq monıtorıng komıteti tóraǵasynyń orynbasary qyzmetin atqardy. Buǵan deıin ol «Qazaqmys korporatsııasy» JShS-da departament dırektory qyzmetin atqarǵan.
Dınara Jeldibaeva Syrtqy ister mınıstrligi Kommýnıkatsııalar departamentiniń dırektory laýazymyna taǵaıyndaldy.Ol 1996 (bakalavr) jáne 1998 (magıstratýra) jyldary ál-Farabı atyndaǵy Qazaq ulttyq memlekettik ýnıversıtetin, sondaı-aq Reseı Federatsııasy Syrtqy ister mınıstrliginiń Dıplomatııalyq akademııasyn támamdaǵan.
Halyqaralyq qatynastar salasynda magıstr dárejesine ıe. Dıplomatııalyq qyzmetin 1997 jyly Qazaqstan Respýblıkasy Syrtqy ister mınıstrliginiń Ákimshilik jáne baqylaý departamentiniń Aqparattyq taldaý jáne josparlaý basqarmasynda referent qyzmetinen bastap, keıin attashe retinde jalǵastyrdy.
1999-2000 jyldary QR SІM Ákimshilik departamentiniń Baspasóz qyzmeti bóliminde attashe bolyp jumys istedi.
2000 jyly QR SІM Halyqaralyq ekonomıkalyq yntymaqtastyq departamentinde úshinshi hatshy qyzmetin atqardy.
2000-2002 jyldary QR SІM Ekonomıkalyq saıasat departamentinde úshinshi jáne ekinshi hatshy laýazymdarynda boldy.
2002 jyly QR SІM Investıtsııalar komıtetinde birinshi hatshy bolyp qyzmet etti.
2002-2003 jyldary QR SІM Halyqaralyq ekonomıkalyq qatynastar basqarmasynda birinshi hatshy, al 2003-2004 jyldary Ekonomıkalyq jáne gýmanıtarlyq yntymaqtastyq departamentiniń keńesshisi boldy.
2004-2006 jyldary QR SІM Halyqaralyq gýmanıtarlyq jáne ekonomıkalyq yntymaqtastyq basqarmasynyń keńesshisi qyzmetin atqardy.
2006-2008 jyldary Qazaqstannyń Japonııadaǵy Elshiliginde keńesshi bolyp jumys istedi.
2008-2013 jyldary QR SІM Halyqaralyq aqparat komıtetinde QR sheteldik mekemeleriniń ımıdjdik jobalaryn iske asyrý basqarmasynyń basshysy boldy.
2013-2021 jyldary QR SІM Halyqaralyq aqparat komıteti tóraǵasynyń orynbasary qyzmetin atqardy.
2021-2025 jyldary Qazaqstannyń Reseıdegi Elshiliginde keńesshi bolyp eńbek etti. QR SІM Kommýnıkatsııalar departamentiniń dırektory qyzmetine taǵaıyndalǵanǵa deıin 2025 jylǵy qyrkúıek aıynan bastap QR SІM Halyqaralyq aqparat komıteti tóraǵasynyń orynbasary qyzmetin atqarǵan.
I synypty Keńesshi dıplomatııalyq dárejege ıe. Aǵylshyn jáne ıspan tilderin meńgergen.
SІM Halyqaralyq aqparat komıtetiniń tóraǵasy – Resmı ókili bolyp Erlan Jetibaev taǵaıyndaldy.
Ol 1984 jyly 15 jeltoqsanda Qaraǵandy qalasynda dúnıege kelgen. 2006 jyly L. N. Gýmılev atyndaǵy Eýrazııa ulttyq ýnıversıtetin bitirgen.
Eńbek jolyn 2006 jyly Qazaqstan Respýblıkasy Syrtqy ister mınıstrliginiń Konsýldyq qyzmet departamentinde maman retinde bastaǵan.
2009 jyly QR Qarjy mınıstrliginiń Memlekettik aktıvterdi basqarý metodologııasy, ishki qarjylyq baqylaý jáne bıýdjettik nesıelendirý departamentiniń sarapshysy bolyp jumys istedi.
2009-2011 jyldary QR SІM Ákimshilik jáne baqylaý departamentinde úshinshi hatshy qyzmetin atqardy.
2011-2017 jyldary Qazaqstannyń Taılandtaǵy Elshiliginde ekinshi, birinshi hatshy laýazymdarynda eńbek etti.
2017 jyly QR SІM EKSPO-2017 Hatshylyǵynyń birinshi hatshysy, keıin QR SІM Azııa jáne Afrıka departamentiniń birinshi hatshysy qyzmetinde jumys istedi.
2018-2020 jyldary «Halyqaralyq jasyl tehnologııalar jáne ınvestıtsııalyq jobalar ortalyǵy» KeAQ Qamtamasyz etý qyzmeti hatshylyǵynyń basshysy, Halyqaralyq yntymaqtastyq jáne klımattyq ınvestıtsııalar departamentiniń dırektory qyzmetterin atqardy.
2020-2023 jyldary QR SІM Baspasóz qyzmetinde keńesshi jáne basshy, 2023-2025 jyldar aralyǵynda QR SІM Kommýnıkatsııalar departamenti dırektorynyń orynbasary boldy. QR SІM Halyqaralyq aqparat komıtetiniń tóraǵasy — Resmı ókili bolyp taǵaıyndalǵanǵa deıin 2025 jylǵy naýryz aıynan bastap QR SІM Kommýnıkatsııalar departamentiniń dırektory qyzmetin atqardy.
II synypty Keńesshi dıplomatııalyq dárejege ıe. Aǵylshyn jáne túrik tilderin meńgergen.
Aqmola oblysy boıynsha ishki memlekettik aýdıt departamentiniń basshysy bolyp Sharap Sádýaqasov taǵaıyndaldy. Ol 1982 jyly Qyzylorda oblysy, Jańaqorǵan aýdany, Talap aýylynda dúnıege kelgen.
Turan - Astana ýnıversıteti men Sh.Ýalıhanov atyndaǵy Kókshetaý memlekettik ýnıversıtetin támamdap shyqqan. Memlekettik aýdıtor. Qarjy jáne memlekettik basqarý salasyndaǵy eńbek jolyn 2006-2016 jyldary qurylys salasynda basshylyq laýazymdarda bastady.
2016 jyly Aqmola oblysy boıynsha ishki memlekettik aýdıt departamentinde memlekettik satyp alýlar aýdıti bóliminiń bas mamany qyzmetin atqardy. Keıin Qazaqstan Respýblıkasy Parlamenti Májilisi apparatynyń Qarjy jáne bıýdjet komıtetinde qyzmetti qamtamasyz etý bóliminiń sarapshysy boldy. Al 2018 jyldan 2022 jylǵa deıin memlekettik organdarynda basshylyq qyzmetterdi atqardy.
2022 jyldan bastap búgingi kúnge deıin Aqmola oblysy boıynsha ishki memlekettik aýdıt departamenti basshysynyń orynbasary qyzmetin atqaryp keldi.
Apta basynda Vasılıı Smolın fýtzaldan Qazaqstan U-19 quramasynyń aǵa bapkeri bolyp taǵaıyndaldy.
35 jastaǵy bapkerdiń eńbek joly «Aıat» (Rýdnyı) klýbymen tyǵyz baılanysty. Onyń jetekshiligimen komanda fýtzaldan ÝEFA Chempıondar lıgasyna shyǵyp, Qazaqstan chempıonatynda kúmis jáne qola júldesin jeńip alǵan.
Onyń shákirtteri U-15, U-17 jáne U-19 jas sanattarynda el chempıony atandy. 2017 jyly U-19 komandasy birinshi oryn alsa, 2018 jyly U-12 quramasy el chempıony boldy. Al 2019 jáne 2020 jyldary U-13 pen U-14 jas sanattary kúmis júldege qol jetkizip, 2022 jyly osy nátıjeni U-15 komandasy qaıtalady.
2025 jyly Vasılıı Smolın fýtzaldan Qazaqstan ulttyq quramasynyń bapkerler shtabynda da qyzmet atqarǵan.