«Apattyń artynda aqsha tur» - baspasózge sholý
***
Aqordada Memlekettik hatshy Ádilbek Jaqsybekov Serra-Leone, Malta, Portýgalııa, Horvatııa, Kıpr jáne Chad Respýblıkalarynyń elshilerinen Senim gramotalaryn qabyldady. Ekijaqty kezdesýler barysynda memleketaralyq qarym-qatynastardyń jaı-kúıi men damý perspektıvalary talqylandy. Osy jaıt arqaý bolǵan maqala el gazeti «Egemen Qazaqstanda» «Áriptestikke qashyqtyq kedergi keltirmeıdi» degen taqyryppen berilgen. Basylymnyń jazýynsha, Elshiler aldynda sóz alǵan Ádilbek Jaqsybekov jahandaný jaǵdaıynda saıası-ekonomıkalyq, saýda, ǵylym, mádenıet jáne ózge de salalardaǵy yntymaqtastyqty damytý memleketterdiń ulttyq múddelerine saı keletinin jetkizdi. Sondyqtan, taraptar keń aýqymdy máseleler boıynsha ózara baılanystardy keńeıtýge aıryqsha múddeli ekendikterin atap ótip, san túrli baǵyttar boıynsha yqpaldastyqty jandandyrý jaıyn talqyǵa saldy. Máselen, olardyń qatarynda halyqaralyq jáne óńirlik qaýipsizdik, ózara ınvestıtsııa jáne saýda, energııanyń balama kózderi men agroónerkásip kesheni, bilim jáne ǵylym, týrızm jáne basqa da perspektıvaly salalar bar.
Májilis depýtaty Ashat Bekenovtyń «Eńbek degen baılyq bar erinbegen jetedi» degen taqyryptaǵy maqalasy «Egemen Qazaqstan» gazetiniń senbilik sanynda basyldy. Halyq qalaýlysynyń jazýynsha, Prezıdenttiń eńbek týraly paıymdary úlken-kishiniń báriniń dittegen oıynan shyqqan másele. «Men ne bitirdim, ne istedim?» dep kádimgideı alańdaǵan egde kisilerdiń degbirsizdengen kúıin kórgende, erekshe tolqynysqa túsesiń. Olar qıyndyqty da, joqshylyq pen jalqaýlyqty da bár-bárin tek eńbek maıdany jeńerin tilge tıek etkende, ata-babalarymyzdyń keıingi ósıet etip qaldyrǵan adal tirlik haqyndaǵy asyl muralary sanany taǵy da otty sáýlemen toltyrady. «Qaı qalaǵa barsań da qurylysta, basqa da aýyr salalarda eńbek etip júrgen ózge ult ókilderin - ózbekterdi, qyrǵyzdardy, t.b. kóresiń. Kóresiń de, ishteı táýbe deısiń. Qazaqtyń osylaı bóten elde bir úzim nan úshin sendelgenin kórgen joqpyz. Demek, ózgeler Qazaqstanǵa qumartqanǵa qaraǵanda, mundaǵy tirshilik olar úshin jumaqqa bara-bar bolǵandyqtan-aý dep oılaısyń. Álgi jumys izdep kelgenderdiń arasynda jasy da, jasamysy da júredi. Qarty bosqan jurtqa qarap, keń-baıtaq Qazaq eliniń búgingi marqaıǵan kelbetine, halqyn tyǵyryqtan alyp shyqqan Elbasy barlyǵyna myń márte shúkirshilik etesiń», - deıdi avtor.
***
«Kókpektide úlken apat boldy. Búkil bir aýyl taǵy da sýǵa qarq boldy. Shúkir deıtinimiz, Qyzylaǵashtaǵydaı emes, bul joly bolatyn apatty aldyn ala boljap, eskertkendikten, halyq aman qaldy. Al basqa jaǵyna nazar aýdarsaq, onda shyǵynymyz Qyzylaǵashtaǵydan kem bolǵan joq», - dep jazady «Aıqyn» gazeti senbilik sanyndaǵy «Apattyń artynda aqsha tur» degen taqyryptaǵy maqalasynda. Jarııalanym avtory «Apat aıtyp kelmeıtindigin» aıta kele apatpen kúresýshiler bar da, apattyń aldyn alýshylar joq bolǵany ma degen saýaldy alqa shyǵarady. «Bizdiń paıymdaýymyzsha, Bojkonyń mınıstrligi apattyń aldyn alýdy emes, apattyń zardabyn joıýdy ádetke aınaldyrǵandaı. Endeshe, halyqtyń bar shyǵynyn Bojko mınıstrligindegi jaýapty tulǵalar esebinen halyqqa óndirip berý kerek. Memleket bıýdjetinen aqsha shyǵyndaýdyń bul arada qajeti joq. Olaı deıtin sebebimiz «apat bolady» dep eskertken tulǵalar aýyl turǵyndaryn apattan qutqaratyn kúsh kólikpen kómektespegenin aıtyp, kókpektilikter zar eńirep otyr. Sonda apattan qutqarýshylardyń bul amalyn nemen túsindirýge bolady», - deıdi avtor.
Osy basylymda Qazaqstannyń Amerıka Qurama Shtattaryndaǵy Tótenshe jáne ókiletti elshisi Qaırat Omarovpen aradaǵy suhbat jarııalandy. Basylym saýaldaryna tuşymdy jaýap bergen Elshiniń aıtýynsha, qazirgi tańda Qazaqstan men AQSh arasynda Aýǵanstan boıynsha tyǵyz yntymaqtastyq bar. Qazaq jaǵy Aýǵanstandaǵy amerıkalyq áskerlerge áskerı maqsattaǵy emes júkterdi jetkizýde aıtarlyqtaı qoldaý kórsetip otyr. Mysalǵa, ótken jyldan bastap, búginge deıin Qazaq jeri arqyly 8300-den asa júk tıelgen konteıner Aýǵanstanǵa tasymaldandy. Sonymen qatar ol Qazaq eliniń «Atom jobasy» ǵalamdyq ıadrolyq qarýsyzdandyrý úderisine qandaı serpilister alyp kelgendigin de tarqata aıtyp bergen. «Barshaǵa málim, Atom jobasy ǵalamdyq ıadrolyq qarýsyzdaný úrdisine qosymsha serpilis berý úshin, atap aıtqanda Jalpyǵa ortaq ıadrolyq synaqtarǵa tyıym salý týraly kelisimniń kúshine enýin qamtamasyz etý maqsatynda Elbasynyń bastamasymen 2012 jyly iske qosyldy. Qazirgi ýaqytta kelisimge 183 memleket qol qoıyp, 161 memleket ony ratıfıkatsııadan ótkizgen, alaıda onyń kúshine enýi úshin Úndistan, Pákstan jáne Koreıa Halyqtyq Demokratııalyq Respýblıkasy tarapynan qol qoıylýy men ratıfıkatsııalanýy jáne Mysyr, Izraıl, Iran, QHR jáne AQSh-tyń ratıfıkatsııadan ótkizýi qajet. Qazaqstanǵa Halyqaralyq ǵylymı-tehnıkalyq ortalyqty aýystyrý, HAEA Halyqaralyq ıadrolyq otyn bankin qurý, Ortalyq referents-laboratorııany salý osy saladaǵy «buzyp-jarar sharalar» qataryna enbek», - dedi ol.
***
«Almatynyń áskerı komıssary Baýyrjan Lekerovke qarsy bılikti asyra paıdalaný faktisi boıynsha qylmystyq is qozǵaldy», - dep jazady «Vremıa» gazeti «My rasskazalı - sledstvıe pokajet» degen taqyryptaǵy maqalasynda. Basylymnyń atap ótýinshe, bul aqparatty elimizdiń Іshki ister mınıstrligi de resmı qýattap otyr. Qazaqstannyń Bas áskerı prokýratýrasynyń tergeý aldy tekserý nátıjelerine sáıkes B.Lekerovtiń ústinen QR QK 380 babynyń 2 bólimi boıynsha is qozǵalyp otyr.
***
«Ekspress-K» gazetiniń jazýynsha, elimizde benzın baǵasy kóterilip kele jatyr. Bul jaıynda keshe Qazaqstannyń janarmaı qaýymdastyǵy málimdep, janarmaıdyń kóterme satýshylary baǵany kótergendigin habarlady. Aıta keterligi, elimizdiń Munaı jána gaz mınıstri Uzaqbaı Qarabalın bir apta buryn jyldyń ortasyna deıin benzın baǵasynyń ózgermeıtindigin aıtqan edi.
«Janar-jaǵarmaı baǵasynyń turaqty bolatyndyǵy týrasynda málimdeme jasalǵanymen, qazirdiń ózinde kóterme baǵa ósip keledi. Egerde AI-92 buǵan deıin tonnasy 108 myń teńge bolsa, qazir 115 myń teńge, keıbir jetkizýshilerde 110 myńnan 120 myń teńge deıin ósip ketti», - deıdi Qazaqstannyń janarmaı qaýymdastyǵy basshysy Bolat Aýetaev.
