Apatqa ushyraǵan poıyzdyń 400-den astam jolaýshysy Almatyǵa jetti
«Almaty-1» temirjol vokzalyna jetkizilgen jolaýshylarǵa medıtsınalyq qyzmet kórsetildi. Sol jerde vokzaldyń medıtsınalyq pýnkti men 10-nan astam jedel járdem qyzmetiniń kóligi kezekshilik atqardy.
Sondaı-aq, jolaýshylarǵa qosymsha aqparattyq-anyqtamalyq aýmaqta temirjol bıletteriniń aqshasyn qaıtaryp alýǵa qatysty keńes berildi.
«Adamdardy belgilengen pýnktke jedel jetkizý úshin Shý stansasyna 7 jolaýshy vagony jiberildi», - dedi «QTJ-júk tasymaly» AQ Almaty qalalyq fılıalynyń dırektory Sársebek Japarov.
Relsten shyǵyp ketken poıyzy jolaýshylarynyń aıtýynsha, oqys oqıǵa bolǵannan keıin jolserikter olardy birden vagonnan syrtqa shyǵarǵan. Shamaly ýaqyt ótken soń temirjolshylar jolaýshylardy basqa poıyzben Almatyǵa jóneltken.
«Qazaqstan temir joly» AQ baspasóz qyzmetiniń málimetinshe, atalmysh oqıǵa Astana-Almaty baǵytymen júretin poıyzdardyń júrý kestesine kedergi keltirmedi.
Buǵan deıin Astanadan Almatyǵa bara jatqan jolaýshylar poıyzynyń apatqa ushyraǵanyn habarlaǵan bolatynbyz.
Odan keıin «Qazaqstan temir joly» ulttyq kompanııasy «Astana-Almaty» baǵytynda qatynaıtyn poıyzdyń apatqa ushyraýyna qatysty resmı málimdeme jasap, oqıǵanyń shyǵý sebebin tekseretin arnaıy komıssııa qurylǵanyn jarııa etken edi.
