AÓK jalpy ónim kólemi 1,8 trln teńgege jetti — AShM
ASTANA. KAZINFORM — Aýyl sharýashylyǵy mınıstri Aıdarbek Saparov 2025 jyldyń birinshi jartyjyldyǵyndaǵy agroónerkásiptik keshenniń damý qorytyndylary boıynsha keńeıtilgen keńes ótkizdi. Bul týraly QR AShM baspasóz qyzmeti málim etti.
Oǵan oblys ákimderiniń orynbasarlary, mınıstrliktiń qurylymdyq bólimsheleri men óńirlik aýyl sharýashylyǵy jáne veterınarııa basqarmalarynyń basshylary qatysty.
— Ótken jyly agrarshylar rekordtyq ónim alyp, ekonomıkanyń barlyq salalary ishinde eń joǵary NKI ósimin qamtamasyz etti. Búginde qarjylandyrý baǵdarlamalary keńeıip, memlekettik qoldaý kúsheıip otyrǵanda, biz qarqyn tómendetýge quqyly emespiz. Barlyq deńgeıde naqty úılestirý men jeke jaýapkershilik qajet, — dedi Aıdarbek Saparov.
Saladaǵy aǵymdaǵy jaǵdaı týraly eseppen Aýyl sharýashylyǵy vıtse-mınıstri Azat Sultanov sóz sóıledi. Onyń aıtýynsha, birinshi jartyjyldyq qorytyndysy boıynsha AÓK jalpy ónim kólemi 1,8 trln teńgeni qurap, ótken jyldyń sáıkes kezeńimen salystyrǵanda 3,7%-ǵa ósti. Bul ósim mal sharýashylyǵyndaǵy (+3,2%) jáne egin sharýashylyǵyndaǵy (+14,5%) kólemniń artýy esebinen qamtamasyz etilgen.
Belgilengen ósim qarqynyn qamtamasyz etpegen óńirler qatarynda Qostanaı, Aqmola, Soltústik Qazaqstan, Túrkistan jáne Shyǵys Qazaqstan oblystary ataldy. Sondaı-aq Jambyl, Jetisý jáne Almaty oblystarynda tamaq ónerkásibindegi óndiris kóleminiń tómendeýi tirkeldi.
Ákimdikterge ónerkásiptik kásiporyndarmen jumysty kúsheıtý, bos turǵan qýattardy iske qosý jáne ınvestıtsııalyq jobalardyń oryndalýyn turaqty baqylaýda ustaý tapsyryldy.
— 1 tamyzdan bastap Ulttyq aýyl sharýashylyǵy sanaǵy bastalady. Ol salanyń jaǵdaıy týraly naqty kórinis qalyptastyrý úshin strategııalyq mańyzǵa ıe. Aýyl sharýashylyǵy taýaryn óndirýshilerin 100% qamtýdy, óńirlerde belsendi aqparattyq-túsindirý jumystaryn júrgizý qajet, — dep atap ótti Azat Sultanov.
Oblys ákimderiniń orynbasarlarynyń nazarynda sondaı-aq kókónis qoımalaryn salý jáne jańǵyrtý jónindegi keshendi jospardy iske asyrý, SQO tájirıbesin taratý baǵdarlamasy boıynsha qarajatty ıgerý, mıneraldyq tyńaıtqyshtardy ýaqtyly engizý jáne elevatorlardy oraq naýqanyna daıyndaý máseleleri boldy.
Aıdarbek Saparov 1 tamyzdan bastap jańa memlekettik qoldaý quraly — mal sharýashylyǵy salasynda jyldyq 5% mólsherlememen 50 mlrd teńge kóleminde jeńildetilgen nesıeleý baǵdarlamasy iske qosylatynyn habarlady. Baǵdarlamanyń qoljetimdiligin arttyrý úshin bordaqylaý alańdaryna qoıylatyn talaptar qaıta qaralyp, eń tómengi qýat kórsetkishteri tómendetildi. Sonymen qatar asyl tuqymdy mal satyp alýǵa arnalǵan «Igilik» baǵdarlamasy da iske qosylady.
Keńes qorytyndysy boıynsha óńirlerge is-sharalar josparlaryn qysqa merzimde ózektendirý, bólingen qarajatty ıgerýdi baqylaýdy qamtamasyz etý jáne memlekettik agrarlyq saıasattyń barlyq negizgi baǵyttary boıynsha aýyl sharýashylyǵy taýaryn óndirýshilerimen jumysty jandandyrý tapsyryldy.
Buǵan deıin habarlanǵandaı, Qazaqstan men EO arasynda aýyl sharýashylyǵy ónimderiniń aınalymy 7%-ǵa ósti.