Antıkor ındýstrııalandyrý baǵdarlamasy arqyly ashylǵan kásiporyndardy teksere me

ASTANA. KAZINFORM – Sybaılas jemqorlyqqa qarsy is-qımyl agenttigi Kazinform saýalyna joldaǵan jaýapta «Údemeli ındýstrııalyq-ınnovatsııalyq damý baǵdarlamasy» dep atalǵan besjyldyqtar nátıjesinde ashylǵan zaýyttardyń jumysyn teksermegenin málim etti.

Másele qaıdan shyqty?

Úkimettiń resmı málimetine sensek, 2010-2019 jyldardy qamtyǵan ındýstrııalandyrý baǵdarlamasynyń arqasynda elimizde 1 250-den astam jańa kásiporyn men 300 myńǵa jýyq jumys orny qurylǵan. 100-ge jýyq el qazaqstandyq ónimderdi tutynýshyǵa aınalǵan. Júk jáne jeńil avtomobıl, elektrovoz jáne transformator, júk jáne jolaýshylar vagony, rentgen jabdyǵy, jaryq-dıodty sham, tıtan buıymdar, dári-dármek, bý týrbınalarymen mys radıatorlar, batareıa sııaqty 500 jańa ónimniń óndirisi jolǵa qoıylǵan.

Al BAQ-ta, áleýmettik jelide osy baǵdarlama aıasynda salynǵan zaýyttardyń ashylmaı jatyp jabylyp qalǵany, 1-2 jyl ǵana istep, keıin Reseı men Qytaı, Ózbekstan kásiporyndarymen básekede kúıreı jeńilgeni týraly derek kóp. Mysaly, Májilis depýtaty Qaırat Balabıevtiń málimeti boıynsha jylyna 67 myń planshet, 40 myń kompıýter, 43 myń monıtor shyǵarady degen «Caspiy Electronic» zaýyty jumysyn toqtatqan. Jylyna 40 myńdaı kólik qurastyrady degen «Tulpar» avtokólik zaýyty, «Qaztehmash» zaýyty, jylyna 100 myń tonna myrysh óndiredi degen Balqash myrysh zaýyty, «KazSat-1» jerserigi, Shymkenttegi 19,3 mln dollarǵa salynǵan «ıÝteks» maqta óńdeý zaýyty, 88,6 mln dollar jumsalǵan «Bıohım» kásiporny ashyla salyp, jabylyp qalǵan. 

Osy kemshilikterge qaramastan, Sybaılas jemqorlyqqa qarsy is-qımyl agenttigi baǵdarlamanyń qarajaty qanshalyqty zańdy jolmen ıgerilgenin, atyshýly jobalar aqsha jylystatýdyń tetigi bolǵan, bolmaǵanyn tekserýge asyǵatyn túri joq. Muny agenttik basshylyǵy jumys reglamentimen baılanystyrady.

Antıkordyń ustanymy

• Sybaılas jemqorlyqqa qarsy is-qımyl agenttigi osy 1 250-den astam kásiporynnyń jumysyna taldaý júrgizdi me/júrgizýdi josparlap otyr ma?
• Qandaı da bir taldaý júrgizilgen bolsa, naqty qaı jobalarǵa bólingen qarajat ózin aqtamaǵany anyqtaldy?
• Osy baǵdarlamanyń basy-qasynda bolǵan Áset Isekeshev, Jeńis Qasymbek, Roman Sklıar (sala mınıstrleri) Kárim Másimov, Serik Ahmetov, Baqytjan Saǵyntaev (premer-mınıstrler) sııaqty sala tizginin ustaǵan azamattardan jaýap alyndy ma? Alynsa, naqty qaı tulǵa jáne qaı kezde, qandaı statýspen iske tartyldy?

Bul suraqtarǵa agenttik qysqa jaýap qaıyrdy.

- Agenttik buǵan deıin ındýstrııalandyrý baǵdarlamasyn iske asyrý salasynda sybaılas jemqorlyq táýekelderine syrtqy taldaý júrgizilmegendigin jáne suraýda kórsetilgen suraqtar boıynsha qylmystyq ister tirkelmegendigin habarlaıdy, - dep jazylǵan jaýapta.

Ondaı syrtqy taldaý júrgizý týraly sheshimdi agenttik óz quzyretiniń aıasynda ǵana qabyldaı almaıtyny aıtylǵan.

- Syrtqy taldaý júrgizý úshin ýákiletti organdardyń birinshi basshylarynyń jáne syrtqy taldaý obektisiniń (olar bolmaǵan jaǵdaıda, olardyń mindetterin atqaratyn ne olardyń laýazymdaryn almastyratyn adamdardyń) birlesken sheshimi negiz bolyp sanalady. Birlesken sheshim sybaılas jemqorlyqqa qarsy monıtorıng nátıjeleriniń, sybaılas jemqorlyq táýekelderin syrtqy taldaý obektisiniń bastamashylyq ótinishi jáne ýákiletti organnyń ony júrgizý týraly sheshiminiń, QR Prezıdentiniń, QR Premer-Mınıstriniń, QR Prezıdenti Ákimshiliginiń tapsyrmalary, QR Prezıdenti janyndaǵy konsýltatıvtik-keńesshi organdardyń sheshimderi men usynymdarynyń, áleýmettanýshylyq zertteý nátıjeleri negizinde qabyldanady, - delingen resmı málimette.