Antıkor Ermek Tursynovtyń elden ketýine baılanysty pikir bildirdi
ASTANA. KAZINFORM - QR Sybaılas jemqorlyqqa qarsy is-qımyl agenttigi rejısser Ermek Tursynovtyń elden ketýine qatysty pikir bildirdi.
Onda BAQ suraýlaryna jaýap retinde qazirgi ýaqytta sybaılas jemqorlyqqa qarsy qyzmet E.Tursynovqa qatysty tergeý is-sharalaryn júrgizbeıtinin habarlady.
QR Sybaılas jemqorlyqqa qarsy is-qımyl agenttigi baspasóz qyzmetiniń habarlaýynsha, bul azamattyń Facebook áleýmettik jelisinde bergen aqparaty Sybaılas jemqorlyqqa qarsy is-qımyl agenttigine belgisiz.
Sonymen qatar buǵan deıin Sybaılas jemqorlyqqa qarsy qyzmetke «Sh. Aımanov atyndaǵy «Qazaqfılm» AQ ishki aýdıt qyzmetiniń qorytyndysymen jáne aryzymen «Dolgoe eho» kórkem fılmin daıyndaý kezinde laýazymdyq ókilettikterin teris paıdalanǵany úshin kınostýdııanyń burynǵy basshylyǵyn qylmystyq jaýapkershilikke tartý týraly «N» rejısseriniń júgingenin habarlaımyz.
Onyń aryzy negizinde sotqa deıingi tergeý bastaldy.
Qosalqy merdigerlik jumystardy jetkizýshi «Alashfilm» JShS bolyp tabyldy, onyń burynǵy dırektory «T» azamaty boldy.
Budan ári onyń buryn «Tursynovfılm» JShS aıasynda rejısser Tursynovtyń bıznes-seriktesi jáne serigi bolǵany anyqtaldy.
«Alashfilm» JShS burynǵy dırektory «T» qatysýymen kýáger mártebesinde birqatar tergeý áreketteri júrgizildi.
Tursynovtyń ózi tergeý organyna shaqyrylmaǵan.
Qazirgi ýaqytta is boıynsha eshkim kúdikti dep tanylǵan joq.
Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.
- Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi, - delingen habarlamada.
Osyǵan deıin sol kezdegi Mádenıet jáne aqparat mınıstrligi «Tursynovfılm» JShS jetekshisi rejısser, jazýshy Ermek Tursynov 2019 jyldan 2021 jylǵa deıin «Besmoınaq» tolyqmetrajdy kórkem fılmin shyǵarýǵa 500 mln. teńge kóleminde memleketten qarjy alǵanyn, alaıda ol fılmdi eshkim kórmegenin jetkizgen bolatyn.