Antıbıotık ishken soń vaktsına saldyrýǵa bola ma

ALMATY. QazAqparat – Antıbıotık qabyldaǵan soń kovıdke qarsy vaktsına saldyrýǵa bolady. Bul týraly S. Asfendııarov atyndaǵy Qazaq ulttyq medıtsına ýnıversıtetiniń juqpaly jáne tropıkalyq aýrýlar kafedrasynyń professory Kúlásh Qurmanova aıtty, dep habarlaıdy QazAqparat tilshisi.

Ǵalymnyń aıtýynsha, antıbıotıkti qabyldaǵan soń onyń aǵzada saqtalý merzimine qaraı vaktsına saldyrǵan durys.

«Mysaly, keıbir antıbıotıkter 12 saǵatta deneden zár, termen birge shyǵyp ketedi. Al keı antıbıotıkter denede jeti kúnge deıin saqtalady. Sondyqtan antıbıotıkti qabyldaǵan soń negizi bir nemese 5 kún ótken soń vaktsına alǵan durys. Al antıbıotıkti tek dárigerdiń nusqaýymen ǵana qabyldaý kerek, óz betimen qabyldaǵan durys emes», - dedi Kúlásh Qurmanova.

Sondaı-aq, professor kovıdke qarsy vaktsına jaıly óz oıyn aıtty.

«Vaktsına - kovıdten qutylýdyń joly. Eger adam vaktsına alyp, onyń aǵzasynda aýrýǵa qarsy antıdene qalyptassa, onda adam kovıdtiń kez kelgen shtamyn juqtyrsa da, aýrý jeńil túrde ótedi. Sondaı-aq, adam ólimi jaǵdaıy azaıady. Sondyqtan vaktsına alý qajet. Oǵan Qazaqstanda tirkelgen jáne óndirilgen vaktsına jaraı beredi», - dedi professor Kúlásh Qurmanova.