Ánshi Nurlan Ónerbaevtyń «qyzy» bestseller avtoryna aınaldy
ASTANA. KAZINFORM – Álemniń segiz tiline aýdarylǵan «Báısheshek» kitaby bestsellerge aınaldy. Bul týraly jazýshy Jámılıa Baqytııarqyzy Jibek Joly telearnasynyń «Búgin LIVE» baǵdarlamasynda aıtty.
Avtordyń aıtýynsha, «Báısheshek» – motıvatsııalyq, zamanaýı self-help janrynda jazylǵan shyǵarma.
– Bul kitap – adamnyń ózine qoldaý kórsetýi, ómirdi jaqsy kórýi, ózine motıvatsııa bere alýy jaıly. Shyǵarma óz ómirime negizdelgen. 10 jyl boıy nevrologııa dertimen kúresip, aqyry jeńip shyqtym. Sol synnan ótken soń «Ómirge ne úshin keldim?», «Nege taǵy bir múmkindik berildi?» degen suraqtar meni oılandyrdy. Kitapty jazýyma da osy jaǵdaı sebep boldy, - dedi ol.
Jazýshynyń aıtýynsha, kitapty jazýǵa eki aı ýaqyt ketken. Avtor kúndelikterinde jazylyp júrgen oılardy jınaqtap, tolyqqandy shyǵarmaǵa aınaldyrǵan.
– Oqyrman tarapynan mundaı suranys bolady dep oılamadyq. Keıin elshilikter tarapynan usynys túsip, kitap 8 tilge aýdaryldy, - dedi Jámılıa Baqytııarqyzy.
Sonymen qatar «Qarlyǵash. Mahabbat eskertkishi» atty ekinshi kitabynyń tanystyrylymyna qazaqtyń kórnekti qalamgeri Dýlat Isabekovtiń qatysýy oǵan erekshe áser etkenin aıtty.
– Jazýshynyń batasyn alyp, tilegin estý – men úshin úlken baǵdar boldy. Sol kezde Dýlat aǵamyz maǵan jadymda erekshe saqtalyp qalǵan eki sóz aıtty: «Jámılıa, ádebıetke kiretin esik bar, shyǵatyn esik joq» jáne «Bireýge jaǵam dep emes, óziń úshin jaz. Júregińnen shyqqan dúnıe ǵana oqyrmanǵa jol tabady», - dedi ol.
Baǵdarlama barysynda avtor tanymal ánshi Nurlan Ónerbaevqa týystyǵy týraly áńgimege qatysty pikir bildirdi.
– Shynymen de ol – meniń ekinshi ákem. Ákemniń týǵan aǵasy retinde bizdiń áýlettiń úlkeni sanalady. Oǵan degen qurmetim erekshe. «Báısheshek» kitabyndaǵy alǵysózdegi aq bata da sol kisiniki, - dedi jas jazýshy.
Sonymen qatar ol qazirgi jastardyń kitap oqýǵa degen qyzyǵýshylyǵy týraly aıtty.
– Jastardyń túrli kitap klýbtaryn ashyp, qazaq jáne álem ádebıetine qyzyǵýshylyq tanytyp júrgenin jıi kóremin. Bir-birimen jarysyp kitap oqıtyny qýantady. Sondyqtan kitap oqıtyn jastar joq emes – bar. Tek smartfon men tehnologııanyń damýy sol kórsetkishtiń sanyn sál azaıtqan bolýy múmkin, - dedi ol.
Buǵan deıin Mustafa Shoqaı jaıly kitap ózbek tilinde jaryq kórgenin jazǵanbyz.
Sonymen qatar keıingi 5 jylda QR Mádenıet jáne aqparat mınıstrligi arhıv, kitaphana jáne kitap isin damytý, osy salalardaǵy kadrlyq áleýetti nyǵaıtý jáne halyqaralyq yntymaqtastyqty keńeıtý baǵytynda aýqymdy jumystar atqardy.