Ańsaǵan sábı: Almatyda 3 myńnan asa áıel ekouryqtandyrý arqyly bala súıdi

ALMATY. QazAqparat- Byltyr 3010 áıelge saqtandyrý esebinen EKU jasaldy. Bul týraly brıfıng barysynda Almaty qalasynyń áleýmettik medıtsınalyq saqtandyrý qorynyń dırektory Tileýhan Ábildaev málim etti, dep habarlaıdy QazAqparat tilshisi.

«QR Prezıdenti Qasym-Jomart Toqaevtyń tapsyrmasy boıynsha elde «Ańsaǵan sábı» baǵdarlamasy jumys istep jatyr. Jyl saıyn ekstrokorporaldy uryqtandyrý, ıaǵnı EKO protsedýrasyna qarajat bólinedi. 2022 jyldyń sońynda Almatyda 3,4 mlrd teńgege ekstrakorporaldy uryqtandyrýdyń 3010 protsedýrasy jasaldy. Qazir qalada medıtsınalyq saqtandyrý qorymen jasalǵan kelisim boıynsha bul qyzmetterdi jeti medıtsınalyq uıym kórsetedi», - dedi Tileýhan Ábildaev.

Aıtýynsha, EKO protsedýrasy joǵary tehnologııalyq medıtsınalyq qyzmetterge jatady jáne qymbat. Buryn bul tegin medıtsınalyq kómektiń kepildik berilgen kólemi aıasynda júzege asyrylyp kelgen.

«Alaıda qarjylandyrý mardymsyz boldy, jylyna 900-1000-ǵa jýyq kvota bólindi. Al 2021 jyldan bastap Memleket basshysynyń tapsyrmasyna sáıkes, kvotalar sanyn jeti esege – jylyna 7 myńǵa deıin arttyrýǵa múmkindik berdi. Protsedýra MÁMS qyzmetteriniń tizimine engizilgen, sondyqtan saqtandyrylǵan patsıentter ony tegin óte alady»,- dep atap ótti spıker.

Buǵan deıin Áleýmettik medıtsınalyq saqtandyrý qorynyń ókilderi, EKU kvotasyn qalaı alýǵa bolatynyn aıtqan edi.