Ankarada qazaq jastary Elbasynyń maqalasyn talqylady
Jıyn Ankara Qazaq jastary Keńesiniń bastamasymen Qazaqstannyń Túrkııadaǵy Elshiliginde uıymdastyryldy. Oǵan Túrkııanyń JOO-da bilim alyp júrgen qazaq magıstranttary men doktoranttary, sondaı-aq sheteldik bilimgerler qatysty.
Elshi Abzal Saparbekuly Qazaqstan Prezıdenti N.Á. Nazarbaevtyń ulttyq rýh pen tarıhı sanany jandandyrý maqsatynda jazylǵan maqalasynyń tek qazaq halqynyń ǵana emes, kúlli Túrki áleminiń tarıhyn zertteýge serpin beretinin, sondaı-aq qazaq tarıxynyń bastaýy, halyqtyń órkenıeti, túrki áleminiń adamzat tarıxyna qosqan úlesi sııaqty mańyzdy taqyryptarmen birge olardy júzege asyrýdyń joldary týraly pikir bildirdi.
Sonymen qatar, maqalanyń qysqa merzimde birneshe shetel tilderine aýdarylǵandyǵyn, ásirese túrik zııalylarynyń zer salyp, yqylas tanytqandyǵyn aıtyp ótti.
Magıstrant pen doktaranttar maqalada jazylǵan negizgi baǵyttardy taldady jáne mádenı, rýhanı jáne tildik qajettilikterin qanaǵattandyrý úshin birlesken sharalar ótkizý jóninde usynystar talqylanyp, jańadan stýdent atanǵan jastar qoǵamdyq-mádenı patrıottyq sharalarǵa atsalysýǵa shaqyryldy.
Kezdesý barysynda jastardyń «Uly daladaǵy kerýen joldardyń tarıhı strategııasy», «Túbi bir túrik bastaýynyń tarıhnamasy», «Uly dalanyń mýzykalyq saryndary», «Ań stıliniń ulttyq naqyshtarynyń tarıhy» taqyryptary talqylanyp, pikirler men usynystar aıtyldy.
Ankara Ýnıversıtetiniń doktoranty Damıra Mahanova «Arhıv-2025 maqsatynyń mańyzdylyǵyn, ult tarıhynyń mádenıeti men qundylyqtaryn bilý men nasıhattaý, ári saqtaý - ult bolashaǵynyń kepili» - dep óz oıyn bildirdi. Elimizdiń tarıhynda oryn alatyn erekshe qundy jazbalar týraly aıtyp ótti.
Mysal retinde Armenııadaǵa Mesrop Mashtots atyndaǵy Matenadaran ejelgi qoljazbalar Instıtýtynda 17 myńnan astam ejelgi qoljazbalar saqtalǵandyǵyn, atalmysh ınstıtýtta qypshaq tilindegi qol jazbalardyń bar ekendigin, biraq qazirgi tańda bul qoljazbalardy zerttep, oqıtyn maman tapshylyǵyn aıtyp, osy salada mamandardyń daıyndalý kerektigine baılanysty pikir bildirdi.
«Uly Jibek joly mádenı-ekonomıkalyq kópir» atty maqalasynda Uly Jibek Jolynyń ótkeni men búgingi úılesimin talqylaǵan áleýmettaný zertteýleriniń doktoranty Nurlan Baıǵalyp maqalanyń buqaralyq aqparat quraldarynda, áleýmettik jelilerde úlken suranysqa ıe ekendigin bildirdi.
Bıologııa ǵylymdarynyń doktoranty Fahreddın Saǵjan «Qazaqstannyń alma men qyzǵaldaqtyń Otany» taqyrybynda baıandama jasady. Bul taraýdyń ózindik fılosofııasy bar ekendigin aıtyp, qyzǵaldaqtyń tez ózgeriske ushyraıtyn gúldiń túri ekendigin, osy qyzǵaldaq sııaqty keleshek urpaq jańa álemdik básekege saı bolýynyń sımvoly dep oı bildirdi.
Jýrnalıstıka salasynda bilim alyp júrgen Dinmuhammed Qasymbek «Ult tarıhyndaǵy kıno jáne mýzykanyń alar orny» atty baıandama jasady. Búgingi tańda, kıno salasy ıdeologııalyq óte joǵary dárejege ıe ekendigin aıtyp, bul salada jańa jobalar jasalyp ulttyq rýhty kóteretin týyndylar jaryq kórý kerektigin aıtty. Qazaqtyń álemge tanytylmaǵan batyr, aqyn, jazýshylary týraly týyndylardy shyǵarý arqyly óskeleń urpaqtyń jadyna ulttyq rýhty quıý kerektigin aıtty.
Kamerýndyq bilimger Ives Paýlın bolsa, maqalanyń halyqaralyq deńgeıdegi mańyzdylyǵyn atap ótti. Suraq-jaýap barysynda bilimgerler tarapynan usynystar da jasaldy. Kezdesý qonaǵy Aqtolqyn hanym Elbasymyzdyń ár Joldaýynda, ár baǵdarlamalyq maqalalarynda usynǵan ıdeıalaryn júzege asyrý halyqtyń enshisinde ekendigin aıtyp, bilimgerlerge ýnıversıtet qabyrǵalarynda mádenıettti tanytý maqsatynda ortalyqtardyń ashylýyn, bizdiń batyr, aqyn, jazýshylardy tanytý maqsatymen teatr úıirmelerin ashý, kishigirim fılmder túsirýlerine keńes berdi. Sonymen qatar, ǵylym salasyn damytý úshin, sheteldik sarapshy, akademıkterdi shaqyrýdyń ornyna bilimgerlerdi sheteldik ǵalymdardyń janyna tájirıbe almasýǵa jiberý arqyly mamandardy daıyndaý kerektigin aıtty.
Elshi A. Saparbekuly Elbasynyń maqalasyndaǵy basym baǵyttardy jan-jaqty túsindirip, aıtylǵan oılardyń barlyǵy jastar úshin keleshegin aıqyndaýǵa septigin tıgizetindigin, osy baǵytta ózderin jetildirý kerektigin aıtty.
Elshi A. Saparbekuly 2017 jyly qurylǵan «Ankara jastary» keńesiniń aldaǵy ýaqytta birge uıymdastyrylatyn túrli sharalar týraly jastardyń oı-pikirlerin tyńdap, olardy júzege asyrýǵa qatysty naqty usynystardy talqylady.