Anglııada Teılor Svıftke arnalǵan keshte áldebireý balalardy pyshaqtap óltirdi

ASTANA. KAZINFORM — Anglııanyń soltústigindegi Lıverpýlge jaqyn ornalasqan Saýtport qalasynda balalar bı klýbyna shabýyl jasaldy, dep habarlady jergilikti polıtsııa. Eki bala pyshaq jaraqatynan qaza tapty, taǵy toǵyzy aýyr jaraqat aldy. Jaralanǵan balalardyń altaýynyń jaǵdaıy aýyr, dep jazady VVS. 

Zardap shekken taǵy eki eresek adamnyń jaǵdaıy aýyr. Polıtsııanyń aıtýynsha, olar «shabýylǵa ushyraǵan balalardy barynsha qorǵaýǵa tyrysqan».

Kórshiles Benks qalasynyń 17 jastaǵy turǵyny shabýyl jasady degen kúdikpen qamaýǵa alyndy.

Sebebi áli habarlanǵan joq, biraq brıtan polıtsııasy bul oqıǵany terrorızmmen baılanysty dep sanamaıdy. Shabýyldaýshy jalǵyz áreket etken degen boljam bar.

Kýágerdiń aıtýynsha, shabýyldaýshy Saýtport qalasynyń ortalyǵyna taksımen kelip, júrgizýshige jol aqysyn tólemeı ketken.

Artynsha kúdikti ánshi Teılor Svıftiń mýzykasyna arnalǵan bı úıirmesine qatysatyn oqýshylarǵa pyshaqpen shabýyl jasaǵan.

Jergilikti turǵyndar qansyrap jatqan balalarǵa medıtsınalyq kómek kórsetilip jatqanyn kórgenin aıtady.

Shabýyl kezinde jergilikti turǵyndarǵa úıinen shyqpaýǵa keńes berildi.

Ulybrıtanııa premer-mınıstri Kır Starmer shabýyldy «naǵyz qaskúnemdik» dep atap, alǵashqy kómek kórsetken tótenshe jaǵdaı qyzmetkerlerine alǵysyn jetkizdi.