Anglııada dárigerler úshinshi kún qatarynan ereýildetip jatyr

LONDON. QazAqparat - Anglııada úshinshi kún qatarynan kishi sanattaǵy dárigerler ereýildetip jatyr. Eger úkimet jalaqyny kótermese, olar jaz boıy jumysqa shyqpaýǵa bekinip otyr, deıdi QazAqparat tilshisi.

Buǵan deıin bolǵan narazylyqtar kezinde 200 myńǵa jýyq naýqas em-domsyz qalǵany belgili. Kásipodaq uıymynyń músheleri úkimettiń usynǵan 5 paıyzdyq ústemeaqysy mardymsyz dep málimdedi.

Ulybrıtanııada kishi sanattaǵy dáriger dep medıtsınalyq oqý ornyn bitirgen jáne 5 jyldan keıin dáriger bolýǵa talaptanyp júrgen mamandardy aıtady. Olar ulttyq densaýlyq saqtaý qyzmetiniń shamamen 45 paıyzyn quraıdy.

«Jalaqymyzdy 35 paıyzǵa kóterýdi talap etemiz. Bir mezette emes, kezeń-kezeńimen ósirsin. Óıtkeni sońǵy 15 jyl kóleminde tabysymyz ınflıatsııaǵa ilese almaı keledi», - deıdi Kásipodaq uıymynyń ókili Sýmı Manırajan.

Buǵan deıin habarlaǵanymyzdaı, qazir Anglııada orman órti órship tur. Tilsiz jaýmen kúreske jumyldyrylǵan órt sóndirýshiler ereýilge shyǵýdy josparlaǵan. Sebebi - aılyq az. Qaýipti mamandyq ıeleriniń jalaqysy bizdiń valıýtamen shamamen 2 mln teńgeni quraıdy. Budan bólek qysqartýlar da kóp, jumys qoly jetispeıdi. Qazir úkimet pen kásipodaq uıymdary kelissózder júrgizip jatyr.