Anastasııa Irýbaeva: Armanym - memlekettik tildiń mártebesin nyǵaıtýǵa atsalysý

KÓKShETAÝ. QazAqparat - Til saıasaty komıtetiniń uıymdastyrýymen el Táýelsizdiginiń 30 jyldyǵyna oraı ózge ult jastary arasynda ótken «Memlekettik til – táýelsizdik sımvoly» respýblıkalyq baıqaýynda Aqmola oblysy bas júldege ıe boldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Qazaq tiliniń qoǵam ómirindegi rólin kúsheıtýdiń negizgi sharttardyń biri – ózge ult jastary arasynda qazaq tiliniń qoldanys aıasyn keńeıtý, qazaq tiliniń etnosaralyq qarym-qatynas tili retindegi qyzmetin nyǵaıtý.

Onlaın ótken baıqaýǵa respýblıkanyń 14 oblysy men Nur-Sultan, Almaty, Shymkent qalalarynan 21-35 jas aralyǵyndaǵy ózge etnos jastary qatysty.

Alǵashqy kezeń aldyn ala jiberilgen qatysýshylardyń ózi týraly 3 mınýttan aspaıtyn memlekettik tildegi beınematerıaldan tursa, kelesi bóliginde qazaq eliniń tarıhy men uly tulǵalary, qazaq jeri jáne onyń aımaqtary jónindegi ekrandaǵy uıashyqtarda kórsetilgen taqyrypta oı terbedi, sońǵy kezeńde «Meniń Táýelsiz Qazaqstanym» taqyrybynda esse jazdy.

Qazylar alqasynyń qyzý talqylaýynan keıin báıgeniń bas júldesin Aqmola oblysy Tselınograd aýdany Araıly aýyly jalpy orta bilim beretin mektebiniń qazaq tili men ádebıeti pániniń muǵalimi Anastasııa Irýbaeva qanjyǵasyna baılady.

«Saıys óte joǵary deńgeıde ótti, ár óńirden qatysqan úmitkerler ortaǵa bar kúsh-jigerin saldy. Búgingi saıysta jeńimpaz atanǵanyma óte qýanyshtymyn. Bolashaqtaǵy arman-maqsatym el bolashaǵyna qaltqysyz eńbek etip, memlekettik tildiń mártebesin nyǵaıtýǵa óz úlesimdi qosý» - dep bólisti baıqaý júldegeri.

Aıta keteıik, Aqmola oblysynyń ókilderi buǵan deıin de birneshe ret respýblıkalyq saıystarda júldeli oryndardy ıelendi.