Anadolu Ajansı – Prezıdent teleradıokesheniniń jańa medıa-seriktesi

ASTANA. KAZINFORM – Ankarada Qazaqstan Respýblıkasy Prezıdentiniń Teleradıokesheni men Anadolu Ajansı túrik memlekettik aqparat agenttigi jańalyq almasý jáne medıa seriktestik salasynda yntymaqtastyq týraly kelisimge qol qoıdy.

Qujatqa qol qoıý saltanaty Qazaqstan Prezıdenti Qasym-Jomart Toqaev pen Túrik Respýblıkasy Prezıdenti Rejep Taııp Erdoǵannyń Túrkııaǵa resmı sapary aıasynda ótti. Kelisimge Prezıdent teleradıokesheniniń dırektory Raýshan Qajybaeva men Anadolu Ajansı basshysy Serdar Karagez qol qoıdy.

Kelisim Qazaqstan men Túrkııa arasyndaǵy aqparattyq ózara árekettestikti tereńdetýge baǵyttalǵan jáne halyqaralyq «Kazinform» agenttigi men Anadolu Ajansı arasynda keńeıtilgen yntymaqtastyqty kózdeıdi.

Taraptar qazaq, túrik, orys jáne aǵylshyn tilderinde jańalyq almasýǵa, ony óz platformalarynda beıimdeý jáne jarııalaý quqyǵyn paıdalana otyryp, kásibı baılanystardy damytýǵa, jýrnalısterdi taǵylymdamadan ótkizý men oqytýǵa kelisim jasasty.

Qazaqstan Prezıdentiniń Teleradıokesheni — eldegi iri medıa kompanııalardyń bir. Onyń quramyna eń kóne halyqaralyq aqparat agenttigi «Kazinform», Jibek Joly, Jibek joly radıosy, Silk Way, Silk Way Cinema telearnalary jáne Derekti fılmder ortalyǵy kiredi.

Anadolu Ajansı — Túrkııanyń halyqaralyq aqparat agenttigi. Ol jańalyqtardy 13-ke jýyq tilde, onyń ishinde aǵylshyn, arab, orys, ıspan, frantsýz jáne taǵy basqa tilderde taratady. Agenttiktiń 100-den astam elde, sonyń ishinde Qazaqstan, Reseı, Qytaı, AQSh, Germanııa, Qatar, Iranda tilshiler jelisi men keńseleri bar.

2025 jyly Anadolu Ajansı men «Kazinform» aqparat agenttikteriniń ekeýi de 105 jyldyq mereıtoıyn atap ótedi.

Buǵan deıin habarlanǵandaı, Prezıdent teleradıokesheni Ońtústik-Shyǵys Azııada medıa seriktestikti keńeıtedi.