Jambyl oblysynda Anabaı ken ornynan gazdyń jańa kózi ashyldy
ASTANA. KAZINFORM — Jambyl oblysyndaǵy Anabaı ken ornynda geologııalyq barlaý jáne gazdyń resýrstyq bazasyn ulǵaıtý jumystary jalǵasýda. №17 uńǵymadan gazdyń jańa kózi ashyldy.
QazaqGaz UK dereginshe, qajetti jumystar júrgizilgennen keıin ónerkásiptik gaz aǵyny alyndy — bul uńǵymany odan ári ıgerýdiń mańyzdy kórsetkishi. Bul - uńǵymanyń joǵary ónimdiligin jáne onyń strategııalyq mańyzdylyǵyn rastaıdy.
- Igerý kezinde gaz alaýy alyndy, bul jospardyń debıttik kórsetkishteriniń joǵary ekendigin kórsetedi. Alaý neǵurlym qýatty jáne joǵary bolsa, uńǵymadaǵy gazdyń shyǵymy soǵurlym joǵary bolady.
Búginnen bastap uńǵyma iske qosyldy, gaz turaqty alyna bastady. №17 uńǵyma Anabaıdaǵy gaz óndirý kólemin ulǵaıtatyn negizgi obektilerdiń biri bola alady, bul óz kezeginde gazdyń resýrstyq bazasyn ulǵaıtýǵa jáne óńirdiń energetıkalyq qaýipsizdigin nyǵaıtýǵa yqpal etedi, - delingen aqparatta.
Anabaı ken ornyndaǵy №17 uńǵymany burǵylaý 2024 jyldyń 3 qyrkúıeginde sátti bastaldy. 25 qarashada mamandar 3690 metr tereńdikten gaz shyqqanyn rastady.
QazaqGaz barlyq tehnologııalyq protsesterdi ońtaılandyrýmen jáne ekologııalyq standarttardy eskere otyryp, Anabaı ken ornyn tıimdi ıgerý boıynsha qoıylǵan maqsattardy iske asyrýdy jalǵastyrýda. Alynǵan nátıjeler geologııalyq barlaýǵa ınvestıtsııa quıýdyń beker emestigin rastaıdy, bul gazdyń turaqty jetkizilýi men gazdyń resýrstyq bazasyn keńeıtýdi qamtamasyz etedi.
Al QazaqGaz 24 jeltoqsannan bastap №18 jańa uńǵymany burǵylaýdy bastady.
Buǵan deıin «QazaqGaz» UK» AQ basqarma tóraǵasy Prezıdentke esep bergen bolatyn.