Ana súti balanyń damýyna qalaı yqpal etedi

ALMATY. KAZINFORM — Omyraý sútimen emizý — ananyń sábıine bere alatyn eń mańyzdy ári qundy syıynyń biri. Sebebi ana sútiniń bala densaýlyǵy men damýyna tıgizetin paıdasy zor. Bul týraly Almaty qalalyq № 2 perınataldy ortalyǵynyń akýsher-gınekology Stanıslav Borısevıch aıtty.

«Birinshiden, omyraý sútinde náresteniń tolyq ósýi men damýyna qajet búkil qorektik zattar bar. Ol quramy boıynsha tamasha teńdestirilgen, balany densaýlyǵyna kerektiń bárimen qamtamasyz etedi. Sondaı-aq, onda shaqalaqtyń ımmýndyq júıesin nyǵaıtýǵa, ony ınfektsııa men aýrýlardan qorǵaýǵa kómektesetin antıdeneler bar. Bul, ásirese, ómiriniń alǵashqy aılarynda, sábıdiń ımmýnıteti áli qalyptaspaǵan kezde óte mańyzdy. Odan bólek, omyraý sútimen emizý ananyń boıynda sút bezi, analyq bez jáne jatyr qaterli isiginiń qaýpin azaıtýǵa kómektesedi. Sondaı-aq, ol bosanǵan soń deneniń qalpyna kelýin tezdetedi», - deıdi Stanıslav Borısevıch.

Dáriger omyraý sútimen emizý kezinde ana men balanyń arasynda tyǵyz emotsıonaldy baılanys ornaıtynyn aıtady.

Bul baılanys nárestede qaýipsizdik, senim jáne mahabbat sezimderin damytýǵa yqpal etedi.

«Odan bólek, omyraý súti — tabıǵı ónim, ol jasandy qospalardy satyp alýǵa jáne daıyndaýǵa qosymsha shyǵyndy qajet etpeıdi», - dep qorytyndylady ol.