Ana men bala ólimin 6 ese tómendete aldyq — Premer-Mınıstr
ASTANA. KAZINFORM — 1 qarashaǵa deıin zamanaýı perınataldyq ortalyqtar qujattamasy ázirlenip, Shymkent pen Qaraǵandyda qurylysty bastaý qajet. Bul týraly Úkimet basshysy Oljas Bektenov tapsyrma berdi.
Onyń aıtýynsha, Prezıdent ana men bala ólimin tómendetýdi densaýlyq saqtaý júıesin damytýdyń mańyzdy basymdyǵy retinde aıqyndap berdi. Bul kórsetkishter óńirlerdiń áleýmettik-ekonomıkalyq ál-aýqaty men elimizdiń jahandyq básekege qabilettilik ındeksine áser etedi.
— Jalpy alǵanda, qabyldanǵan sharalar ana men bala ólimi kórsetkishterin tómendetýge múmkindik berdi. Bul – medıtsına qyzmetkerleriniń eńbeginiń nátıjesi. Aýyldyq jerlerge bilikti kadrlardy tartý jáne olardy ornyqtyrý bolashaq analar men balalar úshin qoljetimdi medıtsınalyq kómek alýyna múmkindik beredi. Sonymen qatar akýsherlerdi, gınekologtar men neonatologtardy, pedıatrlar men reanımatologtardy jetekshi otandyq jáne sheteldik ortalyqtarda turaqty túrde oqytý men qaıta daıarlaý jumystaryn odan ári jalǵastyrý qajet, — dedi O. Bektenov Úkimettiń búgingi otyrysynda.
Úkimet basshysy elordada jáne óńirlerde jetekshi klınıkalar bazasynda oqý ortalyqtaryn damytyp, mamandardy úzdiksiz oqytý baǵdarlamalaryn engizý keregin atap ótti.
Qaýipsiz bosaný jaǵdaıyn jaqsartý boıynsha da turaqty jumys júrgizilýi qajet. Eń aldymen, bul perınataldyq ortalyqtardy zamanaýı jabdyqtarmen qamtýǵa qatysty.
— Sońǵy jyldary ana men bala ólimin 6 eseden astam tómendete aldyq. Memleket basshysy zamanaýı perınataldyq ortalyqtar qurylysyn jalǵastyrýdy tapsyrdy. Bıylǵy jyldyń 1 qarashasyna deıin barlyq qajetti qujattamany daıyndaýdy aıaqtap, Shymkent pen Qaraǵandyda osyndaı ortalyqtardyń qurylysyn bastaý qajet. Áıelderdi júktilikke daıyndaýǵa, aýrýlardy ýaqtyly dıagnostıkalaý men saýyqtyrýǵa baǵyttalǵan «Analar saýlyǵy» baǵdarlamasyn sapaly ári barlyq óńirde tolyqqandy iske asyrý kerek, — dedi O. Bektenov.
Aıta keteıik, jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi.
Aýyldyq jerlerde joǵary syn-qater tobyndaǵy júkti áıelderdi emdeýge jatqyzýǵa, asqynǵan bosanýdan keıingi kezeńde áıelderdi ońaltýǵa arnalǵan «Salaýatty ana» pansıonattary ashylýda.
Buǵan deıin Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp bergen edi.
Sondaı-aq elimizdiń 18 oblysynda perzenthanalar jańǵyrtylyp, 12 qalada zamanaýı perzenthanalar salynatyn boldy.