Ámirjan Álpeıisovtyń Murat Áýezovke arnaǵan «Murat» roman-essesi jaryq kórdi
Tarıhshy Ámirjan Álpeıisovtyń Murat Áýezovtyń ómiri men eńbek jolyna arnalǵan «Murat» roman-essesi jaryq kórdi, dep habarlaıdy Kazinform.
Roman-essede Murat Áýezovtyń ómirbaıany jan-jaqty qamtylyp, eńbek joly, saıası kózqarasy, «Jas tulpar» uıymyn qurǵany jaıly tolyq málimet berilgen.
«Men Murat Áýezov sııaqty qazaqtyń táýelsizdigi úshin sonaý keńes zamanynyń ózinde úgit-nasıhat jasap, „Saryarqa“ degen uıymnyń múshesi bolǵan edim. Sondyqtan Murat Áýezov bizdiń kósemimiz, jol bastaýshymyz sııaqty. Biz „Jas tulpardyń“ qanatynyń astynan shyqqan jas stýdenttik uıymdar boldyq. Sol jas uıymdardyń múshesi bolyp, 70-jyldardan baılanys ornattyq», — deıdi roman-esse avtory Ámirjan Álpeıisov.
Kúni keshe ǵana L. N. Gýmılev atyndaǵy Eýrazııa ulttyq ýnıversıtetinde tusaýkeseri ótken «Murat» roman-essesi — Ámirjan Álpeıisovtyń kópjylǵy eńbeginiń jemisi.
Avtor — Murat Áýezovtyń rýhtas-úzeńgiles inisi.
Birge saıası jumystarǵa qatysyp, qazaq jastarynyń sanasyn serpiltip, Táýelsizdiktiń araıly tańynyń atýyna birigip qyzmet istegen.
«Murat» roman-essesi Murat Áýezovtyń memleket qaıratkeri retinde tulǵasyn jan-jaqty ashyp, jastarǵa otansúıgish qasıettiń qandaı bolatynyn kórsete bilgen.
Roman kópshilik oqyrmanǵa arnalǵan.
