Ámirhan Raqymjanov: Elbasy saıasatynyń sabaqtastyǵy saqtalǵanda elimiz sapaly damý kezeńine shyǵady
- Ámirhan Muratbekuly, 2019 jyl da aıaqtalýǵa jaqyn. Bul jyldyń Siz úshin basty jańalyǵy ne boldy?
- Osy jyldyń 19 naýryzynda Qazaqstan Respýblıkasynyń Tuńǵysh Prezıdenti – Elbasymyz tek Qazaqstan úshin ǵana emes, álemdik saıasatta da jańǵyryq týǵyzǵan mańyzdy Úndeýin jarııalady. Elbasymyzdyń óz ókilettigin toqtatý týraly taǵdyrly sheshimi – álemdik tarıhtyń kúnparaǵyna ozyq saıası mádenıettiń, naǵyz patrıotızm men tereń kemeńgerliktiń jarqyn úlgisi retinde jazylary sózsiz. Toǵyz aıdyń júzi bolsa da qazaqstandyqtardyń árqaısysy osy tarıhı sheshimdi ózderine tikeleı qatysty asa mańyzdy oqıǵa retinde qabyldap, shynaıy rızashylyq sezimderin bildirýde. Bıylǵy jyldyń basty jańalyǵy – osy. Elbasyna degen otandastarymyzdyń bildirip jatqan aqjarma tilekterin sózben aıtyp jetkizý múmkin emes. Osynaý tarıhı sheshimniń mańyzdylyǵy jyl ótken saıyn keńeıe bereri anyq. Bul Elbasymyzdyń bolashaq saıasatkerlerge kórsetken, erekshe jaýapkershilikti talap etetin syndarly saıası sheshiminiń úlgisi dep oılaımyn.
Osy arada, Elbasymyz óz ókilettiligin toqtatyp qana qoımaı, táýelsizdiktiń alǵashqy jyldarynan bastap jetken jetistikterdi ári qaraı jalǵastyratyn sabaqtastyqtyń da negizin qalady. Ol elimizde bolyp jatqan protsessterdiń barlyǵymen jan-jaqty habardar, barlyq jaǵdaıdy biletin bilikti de tájirıbeli memlekettik qaıratker Qasym-Jomart Toqaevty Qazaqstandy álemdegi eń damyǵan 30 eldiń qatarynan qosý mindetin jalǵastyratyn tulǵa retinde usyndy. Osy jylǵy 9 maýsym kúni ótken saılaýda Qazaqstan halqy Q.K.Toqaevty prezıdent etip saılady. Óz kezeginde Memleket basshysy Qasym-Jomart Toqaev saılaýaldy baǵdarlamalarynda da, Qazaqstan halqyna arnalǵan Joldaýynda da Elbasy saıasatynyń sabaqtastyǵyn saqtap, júıeli reformalar júrgizý arqyly Táýelsizdiktiń jetistikterin eselep, elimizdi damýdyń sapaly kezeńine shyǵaratynyn ataǵan bolatyn.
Saıyp kelgende, Elbasymyzdyń sarabdal saıasatymen táýelsizdik jyldary egemen elimizdiń saıası basqarý júıesi men sabaqtastyq dástúri berik qalyptasty. Osy baǵyttan aýytqymaı odan ári damý – tek qana Memleket basshysynyń ǵana emes barsha qazaqstandyqtardyń aldynda turǵan mańyzdy mindet.
Osy oraıda, Elbasy N.Á.Nazarbaev ta elimizdiń aldynda turǵan mindetterdi júzege asyrýdan tys qalmaıdy. Joǵaryda atap ótken Úndeýinde Elbasymyz Qazaqstan halqyna «... ózderińizben birge bolamyn. Elimizdiń, halqymyzdyń qamy – meniń múddem bolyp qala beredi», - degen bolatyn. Elbasynyń osy sózderiniń normatıvtik-quqyqtyq negizi bar ekenin de atap ótkim keledi. «Qazaqstan Respýblıkasynyń Tuńǵysh Prezıdenti – Elbasy týraly» Konstıtýtsııalyq zańǵa sáıkes Tuńǵysh Prezıdentke, onyń biregeı tarıhı mıssııasyna oraı, Qazaqstan halqyna jáne memlekettik organdarǵa mindetti túrde qarastyrylýǵa tıis bastamalar joldaýǵa, Parlament aldynda, Úkimet otyrystarynda sóz sóıleýge, Qaýipsizdik Keńesti jáne Qazaqstan halqy Assambleıasyn basqarýǵa, Konstıtýtsııalyq keńes quramyna enýge ómirlik quqyq berilgen. Sonymen qatar, Nursultan Ábishuly Nazarbaev elimizdegi eń iri saıası kúsh – «Nur Otan» partııasynyń tóraǵasy bolyp tabylady.
Osydan túıer oı, Qazaqstannyń Tuńǵysh Prezıdenti aıqyndap bergen strategııalyq mindetterdi júzege asyrý odan ári jalǵasatyn bolady.
- Tuńǵysh Prezıdentimiz N. Nazarbaev qazaqstandyqtardyń birligi – Qazaqstannyń ilgeri damýynyń basty myzǵymas kepili ekendigin kórsetti. Osy oraıda óz elińe paıdaly bolyp qana qoımaı, óz Otanyńnyń taǵdyry úshin jaýapty bolý – barshamyzdyń, ásirese keleshek ıeleri jastarymyzdyń jaýapkershiligi men boryshy. Jastar jyly ǵana emes – jastarymyzǵa udaıy qamqorlyqtyń Elbasy bekitken prıntsıpterine toqtalyp ótseńiz?
- Táýelsiz memleket qurýdaǵy Tuńǵysh Prezıdent Nursultan Nazarbaev strategııasynyń ereksheligi ol azattyqtyń alǵashqy kúninen bastap eldegi ekonomıkalyq kúrdeli jaǵdaıǵa qaramastan jastardy qoldaý saıasatyna basa nazar aýdardy.
Elbasy osydan jeti jyl buryn «Qazaqstan – 2050» strategııasyn jarııalaǵanda jastarǵa úndeý jasaǵan bolatyn. Ol Úndeýde «Memleket basshysy retinde men árdaıym sizderdiń oqýlaryńyz ben ósip-ónýlerińiz úshin barlyq jaǵdaıdy jasaýǵa tyrystym. Álemdik deńgeıdegi ýnıversıtet, zııatkerlik mektepter ashtym. «Bolashaq» baǵdarlamasyn qurdym. Memleket sizderge aldaryńyzdan jańa múmkindikter ashylýy úshin barlyǵyn jasaýda. Olar – sizderdiń ata-analaryńyz tipti oılap ta kórmegen múmkindikter...», - dedi.
Bıylǵy jyl – elimiz úshin asa mańyzdy tarıhı oqıǵalardan bastalǵanyn jaqsy bilesizder. Elimizde 2019 jyldyń Jastar jyly bolyp jarııalanýy Elbasymyzdyń jas býynǵa arnaǵan jarqyn úndeýine aınaldy. N.Nazarbaev Jastar jylynyń saltanatty ashylý rásiminde jastardyń kókeıinde júrgen barlyq máselelerdi kóterip qana qoımaı, olardy sheshýdiń naqty joldaryn Úkimet pen óńir ákimderine tapsyrma retinde qadap aıtyp berdi.
Qazaqstan halqy búgingi jetistikterine, eń aldymen, qasterli Táýelsizdigine Tuńǵysh Prezıdent N.Nazarbaevtyń qajyrly eńbeginiń arqasynda qol jetkizdi. Sondyqtan, qazaq memlekettiliginiń negizin qalaǵan Elbasynyń jolyn jalǵastyrý – jastardyń paryzy. Osyny Elbasymyzdyń osy jyldyń 19 naýryzyndaǵy tarıhı úndeýinde jastarǵa arnalǵan myna sózderi dáleldeı túsedi: «Táýelsiz Qazaqstanymyzdy, ortaq Otanymyzdy, Máńgilik elimizdi saqtaı bilińizder. Bul – bizdiń halqymyz, bizdiń uly babalarymyzdyń jeri. Otanymyz da, jerimiz de bir. Halqymyzdyń dostyǵy men birligin, bir-birimizge degen senimdi saqtap, elimizdegi árbir azamattyń tól mádenıeti men dástúrin qurmetteı bilińizder». Elbasymyzdyń osy sózderin árbir jas eshqashan umytpaýy tıis dep esepteımin.
- Elbasy Nursultan Nazarbaev ómirbaıany – Táýelsiz Qazaqstannyń tarıhy. Dúnıejúzilik tarıh pen qoǵamdyq damý ınstıtýttary úshin de jer kólemi boıynsha álemniń toǵyzynshy elin uzaq jyldar basqarǵan «Prezıdent Nazarbaev modeli» asa mańyzdy ekendigi anyq. Bul baǵytta Elbasy kitaphanasynyń atqaryp otyrǵan qyzmetteri týraly aıtyp ótseńiz.
- Elbasy kitaphanasynyń basty mindetteriniń biri – QR Tuńǵysh Prezıdenti – Elbasynyń jasampaz ıdeıalaryn ilgeriletý, sondaı-aq qazaqstandyq jastardyń boıyna otansúıgishtikti uıalatý, olardyń elimizdiń qoǵamdyq-saıası jáne áleýmettik-ekonomıkalyq ómirine azamattyq qatysýyn arttyrý. Osy maqsatta 2015 jyldan bastap sol kezde QR Prezıdenti Keńsesiniń Bastyǵy laýazymymen qatar Elbasy kitaphanasynyń dırektory mindetin de atqarǵan belgili saıasattanýshy ǵalym Mahmut Qasymbekovtiń usynysymen júıeli túrde áleýmettik-aǵartý jumystary júrgizilýde. Qazaqstannyń barlyq óńirinen kelgen úzdik stýdentter men oqýshylar, sondaı-aq pedagogtar men memlekettik qyzmetkerler semınar-trenıngter aıasynda apta saıyn oqytýdan ótedi. Elbasy kitaphanasynyń dástúrli eki kúndik semınar-trenınginiń baǵdarlamasy Qazaqstannyń ulttyq tarıhy, Qazaqstan Respýblıkasynyń Tuńǵysh Prezıdenti – Elbasynyń ómiri, qyzmeti men saıasaty, qazaqstandyq memlekettiliktiń qazirgi jáne keleshektegi damý máseleleriniń ózektiligi, «Rýhanı jańǵyrý» baǵdarlamasynda kórsetilgen ulttyq qundylyqtar men rýhanı jańǵyrtýǵa arnalǵan arnaıy jobalardy túsindirý máselelerin qamtıdy. Semınar-trenıng taqyryptary jyl saıyn ózgerip turady: 2015 jylǵy qazan men 2016 jyl aralyǵynda – «Bes ınstıtýtsıonaldyq reformany iske asyrý jónindegi 100 naqty qadam – Ult jospary», 2017 jyly – «Qazaqstandyq jol: Máńgilik el», 2018 jyly – «Rýhanı jańǵyrý: bolashaqqa bastar jol», 2019 jyly – «Bolashaqqa jol ózińnen bastalady».
Dáristerdi elimizge belgili ǵalymdar, ǵylym doktorlary men professorlar ótkizedi. Tájirıbe sabaqtaryna Elbasy kitaphanasynyń ekspozıtsııa-kórme aýmaǵynda ornalasqan ınteraktıvtik ústelder paıdalanylady. Osy arada, elimizdiń túkpir-túkipirinen kelgen jas semınar tyńdaýshylary dáris barysynda Elbasymyzdyń 1997-2004 jyldary alǵashqy Rezıdentsııasy, qazirgi Elbasy kitaphanasynyń mýzeıimen tanysatynyn atap ótkim keledi. Atalǵan mýzeıde Nursultan Ábishulynyń qyzmet jasaǵan bólmeleri, mańyzdy jıyndardy ótkizgen, elimiz úshin taǵdyrly sheshimder qabyldanǵan zaldar sol kúıinde saqtalǵan. Osy ǵımarattaǵy Elbasynyń qyzmet jolynan, memleketimizdiń damýynan syr shertetin jádigerlerdi oqýshylar men stýdentterdiń óz kózimen kórip, qolymen ustap kórýi – olarǵa táýelsizdigimizdi baıandy etýdiń ońaı bolmaǵandyǵyn túsinýge múmkindik beredi. Sonymen qatar, olar semınardan alǵan bilimderin, oń áserlerin mekenjaılaryna oralǵannan keıin ata-analaryna, týystaryna, qurdastaryna jetkizeri sózsiz.
Semınar baǵdarlamasyna teorııadan basqa mıǵa shabýyl, pikirtalas, kishi tobyndaǵy jumys, «Qazaqstan joly» ınteraktıvti ǵylymı-bilim berý ortalyǵyndaǵy tájirıbelik sabaqtar, forsaıt-zertteýleriniń elementteri, sonymen qatar qatysýshylardyń jobalyq qyzmetterine qoldaý kórsetý engizilgen.
Bizdiń semınarlarymyz – memlekettiń baǵdarlamalyq qujattaryn jattaý emes. Eki kúndik sharalarymyz Tuńǵysh Prezıdenttiń Joldaýlary men strategııalyq maqalalarynyń negizgi qaǵıdalaryn túsindirýdi kózdeıdi. Stýdentter, ustazdar, memleket qyzmetkerleri men áskerı qyzmetkerler Elbasynyń árbir tezısinde ómirlik negiz bar ekenin uǵynady. Biz tyńdaýshylardy taldaýǵa úıretemiz. Onyń nátıjesin semınar qorytyndysynda tanystyrylatyn jobalyq jumystardan kóremiz. Osylaısha aldyńǵy jáne keıingi býyn elimizdiń táýelsizdik jyldarynda qol jetkizgen jetistikterine óz ortaqtastyǵyn sezinedi.
Sońǵy 4 jyl aralyǵynda Elbasy kitaphanasynda 160-qa jýyq semınar uıymdastyrylyp, oǵan qatysýshylardyń sany 8 myńnan asty.
Bul qurǵaq sandar bolǵanymen, eger tereńirek paıymdaıtyn bolsaq, árbir sannyń artynda Elbasymyzdyń «Rýhanı jańǵyrý» baǵdarlamasyn jan-jaqty túsingen jáne ózderi turatyn eldi mekenine, mektebine, ýnıversıtetine, jalpy aıtqanda týǵan ortasyna mańyzdy qujatty túsingen jas urpaq, shákirtterine túsindire alatyn bilikti ustazdar tur dep tolyq aıta alamyz.
Onyń bir dáleli – oqý kýrsyn tyńdaýshylar men ǵylymı-pedagogıkalyq qoǵamdastyqtyń joǵary baǵasy bolsa, ekinshi bir dáleli – elimizdiń túkpir-túkpirinen semınar-trenıngke qatysýǵa jańa ótinimderdiń túsýi. Sonymen qatar, Qazaqstannyń basqa óńirlerindegi joǵary oqý oryndary men memlekettik mekemelerden syrtqy semınarlar ótkizý týraly shaqyrýlardyń da kelýi. Bul Elbasy kitaphanasynyń qoǵamǵa asa mańyzdy mindet atqaryp júrgenin bildiretin mańyzdy ındıkator.
Sonymen qatar, Elbasy kitaphanasy 2017 jyldan bastap Qazaqstan Respýblıkasynyń Tuńǵysh Prezıdenti – Elbasy Keńsesiniń Basshysy, saıası ǵylymdar doktory, professor Mahmut Bazarqululy Qasymbekovtiń ıdeıasymen dúnıege kelgen «Nursultan Nazarbaev: dáýir, tulǵa, qoǵam» kóshpeli kórme jobasyn júzege asyryp keledi. Jobanyń negizgi maqsaty – Nursultan Ábishuly Nazarbaevtyń táýelsiz Qazaqstan qalyptasýyndaǵy sheshýshi rólin óńir turǵyndaryna jan-jaqty kórsetý.
Búgingi kúnge deıin atalǵan aýqymdy shara Almaty men Shymkent qalalarynda, Túrkistan, Atyraý, Aqtóbe, Qyzylorda, Jambyl oblystarynda sátti ótti. Joba aıasyndaǵy is-sharalarǵa 900 myńǵa jýyq adam qatysty.
- Qazaqstannyń dúnıejúzindegi aldyńǵy qatarly - órkenıetti 30 eldiń qataryna qosylýy Tuńǵysh Prezıdet – Elbasymyz maqsat etken El muraty! Osy oraıda Otanymyzdyń erteńgi erejesine qajetti qaǵıdalardy halyqqa jetkizýde Sizderdiń taraptan qandaı jumystar júrgizilýde?
- Elbasy kitaphanasy sheteldik prezıdentter ortalyqtarymen, qorlarymen, kitaphanalarymen, zertteý ortalyqtarymen, ǵylymı ınstıtýttarmen jáne mádenı ortalyqtarmen halyqaralyq yntymaqtastyqty júzege asyrady, buqaralyq aqparat quraldarynda (onyń ishinde áleýmettik jelilerde) Elbasynyń saıası bastamalarynyń mánmátinindegi saıası, ekonomıkalyq jáne qoǵamdyq damýdyń kókeıtesti máseleleri boıynsha saraptamalyq sholýdy, suhbatty, baıandamalar men jarııalanymdardy uıymdastyrady.
Bıylǵy jyly Elbasy kitaphanasy delegatsııasy Baký qalasynda (Ázerbaıjan Respýblıkasy) issaparmen boldy. Jumys sapary barysynda qazaqstandyq delegatsııa ekijaqty seriktestikti damytý maqsatynda Geıdar Álıev Qorynyń atqarýshy dırektory A.Alakbarovpen, Ázerbaıjan Áleýmettik zertteýler ortalyǵynyń basqarma tóraǵasy, Mıllı Madjılıs depýtaty Z.Orýdj jáne basqalarmen kezdesti, yntymaqtastyq týraly memorandýmdarǵa qol qoıyldy. 2020 jyly Baký qlasynda mańyzdy is-sharalar ótkizý josparymyzda bar.
Ótken jyly, Qazaqstan elordasynyń 20 jyldyǵyna oraı memleket qaıratkeri, saıasattanýshy ǵalym, Mahmut Qasymbekovtiń ázerbaıjan tilinde jaryq kórgen «Nursultan Nazarbaev. Ómirbaıan» atty kitabynyń tanystyrylymy Baký qalasynda ótti. Geıdar Álıev ortalyǵy, Qazaqstan Respýblıkasy Tuńǵysh Prezıdentiniń kitaphanasy jáne Halyqaralyq túrki akademııasy arasyndaǵy yntymaqtastyqtyń arqasynda shyǵarylǵan týyndynyń tusaýkeser rásiminiń Ázerbaıjannyń jetekshi ǵylymı jáne mádenı-bilim berý ortalyqtarynyń biri – Geıdar Álıev ortalyǵynda ótýiniń de sımvoldyq máni bar.
Sondaı-aq, 2018 jylǵy mamyrda Ázerbaıjan ult kóshbasshysy Geıdar Álıevtiń 95-jyldyǵyna oraı qazaq tiline aýdarylǵan ázerbaıjan halqynyń uly perzenti týraly jazylǵan «Eline jol ashqan» kitabynyń da tusaýkeseri el júregi Nur-Sultanda ornalasqan Nazarbaev ortalyǵynda joǵary deńgeıde ótti.
Sonymen qatar, osy jyldyń kúzinde Tokıoda (Japonııa) «Qazaqstan-Japonııa: ıadrolyq qarýsyz álemge jol» atty Elbasy kitaphanasynyń kóshpeli ǵylymı-ekspozıtsııalyq jobasy júzege asyryldy. Sondaı-aq, Japonııa delegatsııasynyń Qazaqstanǵa, onyń ishinde Elbasy kitaphanasyna sapary aıasynda Goı beıbitshilik Qorynyń (The Goi Peace Foundation) prezıdenti H.Saıondjımen, «Soka Gakkaı Interneshnl» (Soka Gakkai International) uıymynyń, Tokıo Ulttyq mýzeıiniń basshylyǵymen, Honda Qorynyń prezıdenti Hıroto Ishıdamen kezdesýler ótti.
Elbasy kitaphanasy óziniń ǵylymı-zertteý jumystary aıasynda bıyldyń ózinde birqatar iri ǵylymı konferentsııalardy («Nursultan Nazarbaev: bolashaq búginnen bastalady»; «Ideıadan naqtylyqqa: QR Tuńǵysh Prezıdenti – Elbasy Nursultan Nazarbaevtyń eýrazııalyq bastamasyna 25 jyl», «Kemeńgerliktiń 30 jyly», «Elbasynyń tarıhı mıssııasy: Jahandanǵan álemdegi qaýipsizdik jáne turaqtylyq») jáne Jastar jylyna, prezıdenttik ınstıtýtqa jáne saıasattanýdyń zamanaýı máselelerine arnalǵan dóńgelek ústelderdi ótkizdi. Olardyń qorytyndysy boıynsha 14 ǵylymı basylym daıyndaldy, olardyń arasynda ujymdyq monografııalar, konferentsııalar materıalynyń jınaqtary, materıaldar men qujattar jınaqtary, albomdar, aqparattyq-anyqtamalyq basylymdar jáne basqalary bar.
Bıyl bir myńnan astam tyńdaýshy úshin 21 oqytý semınary ótkizildi. Elbasynyń «Uly dalanyń jeti qyry» maqalasy boıynsha memlekettik qyzmetkerler úshin arnaıy ázirlengen «Library-practicum» ǵylymı-praktıkalyq semınary – kóshpeli semınardyń jańa formaty retinde maquldandy. Mundaı semınarlar Qyzylorda, Almaty, Pavlodar jáne Jambyl oblystarynyń memlekettik qyzmetkerleri úshin júrgizildi. Bıyl alǵash ret elordalyq úsh mekteptiń 30 synybynda «Táýelsiz Qazaqstannyń Tuńǵysh Prezıdenti» jáne «Astanalar - memlekettiliktiń nyshany» taqyryptarynda eriktiler saǵaty uıymdastyrylyp, ótkizildi. Elbasy kitaphanasynyń Interaktıvti bilim berý ortalyǵynda 2 attestatsııalyq mýzeılik sabaq jáne «Týǵan jer» jobasy aıasynda 3 sabaq ótti.
Búginde Elbasy kitaphanasynyń kitap qory 33 myńnan astam saqtaý birligin quraıdy. Bul – Nursultan Nazarbaevtyń ózi jazǵan týyndylar men oǵan ár jyldary tartý etilgen kitaptar. Elbasymyz ótken ǵasyrdyń 60-ynshy jyldarynan bastap sırek kezdesetin kóne kitaptardy jınaǵan. Sondaı-aq, kitap qorynda álem saıasatkerleriniń estelik qoltańbasy bar kitaptardy kezdestirýge bolady. Olardyń arasynda Donald Tramp, Sı Tszınpın, Lı Kýan ıÝ jáne basqa da lıderlerdiń qoltańbasy bar kitaptar bar. Oqyrmandar elektrondyq katalogtyń kómegimen Elbasy kitaphanasyndaǵy kitap qorymen tanysa alady.
Ózińizge belgili, Elbasy kitaphanasy eki ǵımaratta ornalasqan: Nazarbaev ortalyǵy jáne joǵaryda atap ótken elimizdiń elordasyn Almatydan Astanaǵa aýystyrǵannan keıin Qazaqstan Respýblıkasynyń Tuńǵysh Prezıdenti 1997–2004 jyldar aralyǵynda qyzmet etken alǵashqy Rezıdentsııasy, qazirgi Elbasy kitaphanasynyń mýzeıi. Atalǵan eki ǵımaratta N. Á. Nazarbaevtyń ómiri men qyzmeti arqyly táýelsiz Qazaqstannyń qalyptasýy men damýynyń negizgi kezeńderin aıshyqtaıtyn biregeı jádigerler usynylǵan. Bizdiń negizgi baǵyttarymyzdyń biri – joǵaryda atalǵan jádigerlerdi otandastarymyz men shetelden kelgen qonaqtarǵa jan-jaqty tanystyrý. Osy arqyly Qazaqstandy álemge pash etý. Bıylǵy 9 aıda Elbasy kitaphanasynyń ekspozıtsııalary men qor jınaqtarymen 300 myńnan astam adam tanysqan. Jalpy eseppen ótkizilgen 10 myńǵa jýyq ekskýrsııanyń jartysynan astamy qazaq tilinde bolsa, qalǵany orys jáne aǵylshyn tilderinde júrgizilgen. 70% kelýshi uıymdasqan ekskýrsııalyq toptyń quramynda júrse, qalǵany kelýshi ekskýrsııa mamanynyń kómegine júginbeı-aq, jádigerlermen ózdiginen tanysqan. Ekskýrsııa qatysýshylarynyń jartysynan kóbin orta bilim berý mekemeleri men joǵary oqý oryndarynyń stýdentteri quraıdy. Al, kelýshilerdiń 15% – sheteldik týrıster. Sheteldik týrısterdiń negizgi bóligin Reseı jáne Qytaı eliniń azamattary quraıdy. Sonymen qatar, mýzeıdi Eýropa, Azııa, Soltústik jáne Latyn Amerıkasynyń azamattary, Afrıka elderinen (Zımbabve, Efıopııa, Mysyr, Ońtústik Afrıka Respýblıkasy, Aljır jáne t.b.) kelgen qonaqtar tamashalady.
Sonymen qatar, «N.Nazarbaev: dáýir, tulǵa, qoǵam» kóshpeli kórme ekspozıtsııalarymen 400 myńnan astam adam (Qyzylorda oblysynda – 160 myńnan astam, Jambyl oblysynda – 182 myńnan astam) tanysty. 7 myńnan astam adamdy qamtyǵan 50-den astam kóshpeli ekskýrsııa ótti.
Qazirgi ýaqytta 2020 jylǵa arnalǵan josparlarymyz pysyqtalýda. Joǵaryda atalǵan Elbasy kitaphanasynyń is-sharalary Reseıde, Ázerbaıjan, Qyrǵyzstanda jáne Qazaqstannyń birqatar óńirlerinde (Shyǵys Qazaqstan, Qostanaı, Pavlodar oblystary) jalǵasady dep kútilýde.
- Áńgimeńizge rahmet!
Avtor Mahat Sadyq
