Amerıkalyq Wabtec kompanııasymen birqatar kelisimge qol qoıyldy
NЬıÝ-IORK. KAZINFORM — Memleket basshysynyń Nıý-Iork qalasyna resmı sapary aıasynda AQSh Saýda mınıstri Govard Latnıktiń qatysýymen amerıkalyq Wabtec kompanııasymen jalpy somasy 4,2 mıllıard dollar bolatyn kelisimge qol qoıý rásimi ótti. Bul týraly Aqordanyń baspasóz qyzmeti habarlady.
Qujatta Qazaqstanǵa tehnıkalyq turǵydan jetildirilgen 300 lokomotıv jetkizý jáne oǵan servıstik qyzmet kórsetý qarastyrylǵan.
Kólik tehnologııasy boıynsha álemdegi kóshbasshy kompanııa elimizdiń temirjol salasyn jańǵyrtý isinde negizgi seriktesterimizdiń biri sanalady.
2009 jyldan beri Astanada Wabtec Kazakhstan lokomotıv qurastyrý zaýyty tabysty jumys istep keledi. Osy aralyqta kompanııa óndiriske 230 mıllıon dollardan astam ınvestıtsııa quıdy. Kásiporyn búginge deıin «Qazaqstan temir jolyna» jáne eksportqa arnalǵan 600-den astam lokomotıv qurastyrdy. Óndiristiń lokalızatsııa deńgeıi 45 paıyzǵa jetti.
Byltyr shilde aıynda Wabtec kompanııasy elimizde ınnovatsııalardy engizip, kadr daıarlaýǵa úles qosatyn tehnologııalyq jáne ınjenerlik ortalyǵyn ashty.
Aıta ketelik Nıý-Iork qalasyna sapary barysynda Qasym-Jomart Toqaev Donald Tramppen sóılesken edi.