Amerıkadan eki astronavt áıel Baıqońyrǵa keldi

ASTANA. QazAqparat -  Baıqońyr ǵarysh aılaǵynda Halyqaralyq ǵarysh stantsııasyna baratyn ekspedıtsııanyń 56/57 ekıpajdary ushý aldyndaǵy sońǵy daıyndyqqa kiristi, dep habarlaıdy QazAqparat tilshisi.

2018 jyldyń 19 mamyrynda «Soıýz MS-09» transporttyq basqarylatyn kemeniń negizgi jáne qosalqy ekıpajdarynyń ǵaryshkerleri men astronavtary Baıqońyrǵa kelip, ǵarysh aılaǵyndaǵy jattyǵýlarǵa kiristi.

Ǵarysh aılaǵy men kásiporyndar basshylyǵy «Kraınıı» áýejaıynda Soıýz MS-09» TBK negizgi ekıpajyn - reseılik ǵaryshker Sergeı Prokopevti, germanııalyq Aleksandr Gerstti jáne amerıkalyq Serına Aýnen -Chensellordy jáne dýblerleri - reseılik Oleg Konenko, amerıkalyq Enn Makleın jáne kanadalyq Davıd Sen-Jakty kútip aldy.

Eki aptadan astam ýaqyt boıy olar Baıqońyrdyń 17 alańyndaǵy Ǵaryshkerlerdi daıyndaý ortalyǵynda ushýǵa daıyndalady.

Roskosmos baspasóz qyzmetiniń habarlaýynsha, mamandardyń baqylaýynda ǵaryshkerler men astronavtar  «Sokol» skafandryn kıip kóredi jáne ǵarysh kemesiniń ishinde skafandrmen jumys istep kóredi.

«Soıýz MS-09» transporttyq basqarylatyn kemesi 2018 jyldyń 6 maýsymynda 17 saǵat 12 mınýtta Baıqońyr ǵarysh aılaǵynyń №1 alańqaıynan («Gagarınskıı start») ushyrylady.