Ambýlatorııalyq emdeýdi kúsheıtý óte mańyzdy - Altaı Kólginov

NUR-SULTAN. QazAqparat – Elorda ákimi Altaı Kólginov emhanalar men aýrýhanalardyń bas dárigerlerimen, qalanyń sanıtarlyq dárigerimen onlaın keńes ótkizdi. Bul týraly QazAqparat ákimdikke silteme jasap habarlaıdy.

Ákim emhanalarda ambýlatorııalyq emdeýdi kúsheıtýdi, naýqastardy baqylaý barysynda telemedıtsına quraldaryn paıdalanýdy jáne tıisti deńgeıde jedel kómek kórsetýdi tapsyrdy. Sondaı-aq ambýlatorııalyq emdeýdi kúsheıtý qajettigin de atap ótti.

«Naýqastardyń 60%-dan astamy emhanalarǵa júginedi. Munda ambýlatorııalyq emdeýdi kúsheıtý óte mańyzdy. Aýrýdyń alǵashqy kezeńinde turǵyndarǵa barlyq qajetti medıtsınalyq kómek kórsetilýi kerek. Juqpaly aýrýlar statsıonary dárigerleri Covid-19-ben kúresýde aıtarlyqtaı tájirıbe jınady. Olar telemedıtsınany paıdalana otyryp, keńes berip, emhanalardyń medıtsınalyq qyzmetkerlerimen tájirıbe almasatyn bolady. Ekinshi másele, karantın kezinde josparly emdeýge jatqyzý ýaqytsha toqtatyldy, munda naýqastarmen keri baılanysty kúsheıtý kerek. Qajet bolǵan jaǵdaıda emdeýge jatqyzǵan jón. Shuǵyl aýrýhanaǵa jatqyzylatyn jaǵdaıdy árbir dáriger baqylaýda ustaýy tıis. Úshinshiden, Densaýlyq saqtaý mınıstrligi men «SK Farmatsııa» birlesip, aýrýhanalar men emhanalardy qajetti medıtsınalyq jabdyqtarmen tolyqtyrý boıynsha jumystar júrgizemiz. Qamtamasyz etý máselesi baqylaýda bolady», – dedi elorda ákimi Altaı Kólginov.

Qala ákimi atap ótkendeı, árbir naýqasqa sapaly medıtsınalyq kómek kórsetilýi, aýyr naýqasqa shaldyqqandar erekshe baqylaýda bolýy tıis . Ár naýqastyń ómiri úshin sońyna deıin kúresý qajet.