Amanat-tyń qoǵamdyq keńesteri sany qysqardy

NUR-SULTAN. QazAqparat – «Amanat» partııasynyń aımaqtardaǵy fılıaldarynyń jumysy kúsheıtiledi. Bul týraly «Amanat» partııasynyń atqarýshy hatshysy Ashat Oralov aıtty, dep habarlaıdy QazAqparat tilshisi.

«Búgin elimizdiń Prezıdenti, «Amanat» partııasynyń tóraǵasy Qasym-Jomart Toqaevqa partııany jańǵyrtý baǵdarlamasyn iske asyrý boıynsha málimet, aqparat berdik. Eń aldymen «Amanat» partııasynyń kezekten tys sezinde bergen tapsyrmalarynyń oryndalýy boıynsha tolyq aqparat jetikizildi. Ásirese, osy bir aıdyń tóńireginde «Amanat» partııasynyń ortalyq apparaty Qazaqstannyń tórt aımaǵyna shyǵyp, belsendi partııa múshelerimen, bastaýysh partııa uıymdarynyń ókilderimen, zııalyq qaýym ókilderimen, jastarmen kezdesti. Sol kezdesýlerde kóterilgen máselelerdi búgin partııa tóraǵasyna jetkizdik», - dedi Ashat Oralov Aqorda baspasóz qyzmetiniń Telegram-ynda jarııalanǵan vıdeoda.

Onyń atap ótýinshe, Memleket basshysynyń partııanyń kezekten tys sezinde bergen tapsyrmalaryn sapaly oryndaý maqsatynda «Talqylau» suhbat alańy iske qosyldy.

«Kóptegen is-sharalarymyz eń aldymen aımaqtarda ótedi degen josparladyq. Ásirese, oblystardaǵy, qalalardaǵy, aýdandardaǵy fılıaldarymyzdyń belsendiligin arttyramyz dep kózdep otyrmyz. Qoǵamdyq keńester boıynsha da jumystar atqarylatyn bolady. Eń aldymen olardyń sany 1700-den 1 myńǵa qysqartyldy. Qysqartý tek ortalyq apparatta ǵana emes oblystarda 12-den 8-ge, aýdandarda 9-dan 5-ke qysqarady. Bul jergilikti memlekettik mekemelermen birlesip, jumysty sapaly oryndaý maqsatynda qabyldanyp jatqan sheshimder dep oılaýǵa bolady», - dedi partııanyń atqarýshy hatshysy.

Aıta keteıik, Memleket basshysy Qasym-Jomart Toqaev «Amanat» partııasynyń atqarýshy hatshysy Ashat Oralovty qabyldaǵan edi.